Sia Thang Hum, Tongsan Int'l Consultant tawh Holimna
Written by Sia Kham Peek Saturday, 14 May 2011 20:04
Lungdampihna: Sia John Thang Hum-te Nupa Ordination Ngahna
April 28, 2011 ni Houston, Texas, khuapi ah South Texas District (AG)-te in kum cin khawmpi nei uha tua mun mah ah siampi za (ordination) piakna zong aneihna vuah Zomi sungpan Sia Thang Hum le Siama Zamnute nupa in zong ordination san theihna hun pha ngah thei uh ahimanin Tongsan panin lungdampihna lianpi i pulak hi.
Kiim le paam pan Zomi ahitheite'n siampi za ngahna pawi va uap thei uha Khawmpi hun man ciang Boumont, Texas, panin siapate siampi za ngahna pawi uap dinga ong pai Sia Khai Pau-te innkuan in an sai thupi mahmah khat ah lungdampihna ankuang umkhopna zong neihpih thei uh ahimanin akua maciat kha thu le taksa thu ah kitai mahmah cih thu kiza hi.
Sia Thang Hum-te nupa pen US le Mexico gamgi khua khat ahi Texas gamke Laredo khua ah phualsatin Global Impact Prayer House min tawh Topa lenggah huan ah mapangin aom uhi-a nupakop aa ordination ngahkhawm masapen pawl hi pah ding uhi.
Bekthamlo Sia Thang Hum pen Tongsan Media Group ii International Consultant khat le Texas Zomi Innkuan ah kha lam makaipi khat ahihna tawh kizuiin TMG in Siapa tawh holimna tomno khat anuaia bangin ka ngah thei uhi. Hun ong pia Siapa tungah zong TMG panin lungdamna lianpi i ko hi. (Tongsan Reporter)
++++++++++
TMG: Sia Hum, kiho theih nading hun nong piak theih lungdam ei. Amasain laisim mipite theih theih dingin na pian zia background themkhat nong gen masa thei dia?
JTH: Thangnuai khua pan piang ing. Pasian nasem innkuan pan akhangkhia hi ing. Ka pa pen Tuiphum sungah kum 34 sung pawlpi kem sia sem hi. Unau 7 lakah alai zang lian hi ing.
TMG: Na Pasian nasepna atomkimin nong gen thei diam?
JTH: 1975 kum, Tonzang khua aa TBA sivuai ah Rev. Khambawi thugenna le Rev. Khai Suan counseling tungtawna piangthak hi ing. Tua pan kipan Pasian ka lunggulhna khangin Pasian na ka sep nopna khang semsem hi. Tonzang sangkahkawmin, pawlpi sungah Sunday School sia semto in, tua pan youth pastor le Evangelist sem to ing. Sangkah ka man teh khua ah pastor kum khat semin, tua pan Kawlpi Maranatha AG sang ah laihilhin, tua kawmin Rhema AG ah pastor sem ing. Tua teh US ah sangkahin tua pan ka man teh tulaitak ka sepna Global Impact Prayer House ah ka zi (Siama Zamnu) tawh pastor semkhawm ung.
TMG: Lai Saingtho sang kahna na nei hia?
JTH: 1984 kum in India gam Bangalore, Southern Asia Bible College ah kahin B.Th man ing. 1994 kum in Fuller Theological Seminary ah M.A. le M.Div. (EQ) man ing. Tulaitak zong online pan Ph.D. ading thesis ka gelh laitak hi.
TMG: Na pawlpi thu uh nong gen thei diam?
JTH: I gensa bangin ka pawlpi min uh Global Impact Prayer House hi. Fuller pan sang ka man teh sum kisam ka himanin na ka sep leh tu-a ka om na uh Laredo, TX, Mexico gamgi tung kha ing. Kum khat khit teh ka zi le ka tate US hong tung uha, ka pai theihna dang ding uh thei tuanloin thu ngengen ung. Ansai ah semkawmin ka nupa un ka omna lui First AG pawlpi ah khangham Sunday School hilhkawm ung. Tua kawmkawmin ka zi in door to door evangelism bawlin, cina damna, dawi hawlkhiatna le nalamdangte, nu pa kikhen dingte kikhenlokik cihte tampi ong omna tungtawnin minam dang lak akiphu zo suak hi. Ka zi tungah Pasian hopihna le aneu akipan Pasian sapnate tungtawn zongin hangsanna Pasian in piaa, tua tungtawnin antangin thungen toto ung. Tua pan hong piangthak mite ka inn uh ah samin tentan pia totoin pawlpi hong suakto hi. Tulaitakin pawlpi mi 50 kiim pha ung. Biakinn dingin inn khat kha khat $ 3,000 tawh sapin kikhopna nei ung. Biakinn ka lut un mi kician 6 tawh ka lut uha, innkuan nih in sehsuah pia uhi. Adang teng retired le na sep neilo veive uhi.
TMG: Biakinn sap tam si e. Baih kei si in teh.
JTH: Midang tampi in zong tua mah ong patauhpih uhi. Ahizong Pasian aw za-a i sep leh Pasian in a maban tavaun la hi. Biakinn pen thungetna dinga kikawm hi masa hi. 24/7 aa thunget theih nang kingaihsun hi. Tua bangmah thu kingen takpiin, nalamdang piangin, mite suahtakna ngah uhi. Pasian in sum pammaih saloin, i sepnopna, i sep thute hong en masa hi. Tuni ciang dong nisim thu kingen tatsatlo, nalamdang pianga, sum piak zawhloh hun om nailo hi. Pasian pen Amah mah kisiktawm Jehovah Jireh hi. Amen. Pawlpi ah kei le zum nasem khat in khasum sang ung.
TMG: Na pawlpi uh kuamite ahia? Ei Zomi atam maw?
JTH: Pawlpi mi atamzaw America mite hi. Service pen Mangpau tawh ka zat uhi. Hispanic-te (Spain kam zang mi namdangte), Mangkang te, Africa pan, Guam pan, native Indian-te, Jews, ei Zomi bel ko tawh inn 3 pha ung. US AG tawh kizom ung.
TMG: Na Ordination lakna tawmkhat nong gen thei diam?
JTH: US ah Pasian na sep ding pen ka lungsim in ngaihsut-a ka neih vetloh, inn lam mah i mitkha ah bei theilo kawmkal le hun hong bei toto hi. Tua kawmkal ah thu ngenngenin, ansai hon ding ngaihsun-a ka om laitak, sum zon na nusia in tua pan Pasian na sem totoin suak hi ing. US aa AG te pen siampi za piak ding sang pakpaklo, background asittel tiltelte uhi. Kawlgam pan ka neihsa uh License hong san saklo uha, siampi za ading college level laivuan subject thum hong nei saka, tua ka on khit uh teh amau credential ka ngah pan uhi. Tua kawmkal ah, meeting le seminar tuamtuam kahin, laivuan, interview tampi om totoa tua teng khitteh akum aa ngakto zelin, ataw pan ka pat uh kum 5 khitteh Ordination hong pia uhi. Ngaklahhuai phial taleh ka ahi ding mah na hi hi. AOG pawlpi in doctrine le mimal muanhuiana nak ngaihsut mahmah hi. Ordination a piak dan uh them khat hong gen lai lengh; Khut hong nga ding sia, Rev. ngahsa hong kiteel sak hi. Sia khat in candidate mi khat ta tavuan la hi. Tua pen Ordaining elder ci uhi. Tuate pen amau mentle (a kha hong hawm ding) cihna hi. Ko kuamah ka theih uh omlo, ka teel ding uh theiel lo kim laiin amau hong vaihawm sak bang ka lak uh leh, ahoihpen tuak ka ngah kha uhi (adang te hoih lo ka cihna hi tuanlo). Tua pen ei Kawlgam ah om ngeilo thu khat hi. Thu hong kinget sak hun sung pen Kha Siangtho lawnna khauh lua ahimanin, kikap ziahziah hi mai hi. Ka nupa un hampha kisa pha diak ungh.
TMG: Zomi akua mapeuh in hong lungdampih, hong angtanpih ding lamen ing.
JTH: Zomi akua mapeuh in hong lungdampih mah. Mi tampi in lungdampihna lai, card le letsong tuamtuam hong pia uha, ka angtang mahmah uhi. Ordination na ngah ni un, lawm le gual tampi hong pai in hong uap thei ahimanin zong angtang mahmah ing. Hong lungdam pih kehmepeuh tungah lungdamkohna genkik nuam ing.
TMG: Lungdam ei le, Sia. Topa'n ong makaih hen o.
Subscribe to this comment's feed
