zomi aw lung lau ken!

ARTICLES Zokam Zomi Khuado Pawi Thu
BLUE GREY RED

Zomi Khuado Pawi Thu

PDFPrintE-mail

short-storyZomi Khuado Pawi thu ka gelh hangin Khuado thu a tel pen cih bang hi loin, i khanglui ngeina sungah a khangkhia leh a kidiah ngei zong ka hi kei hi. Tua ahih manin hih khuado thu kong gelh khiat zong mi tuamtuamte' gelh ka kaihkhop hi lelin, a thu a kicin khit loh ding banah mi tuamtuamte theih dan tawh zong kibang khinlo kha ding hi. Ahi zong Khuado pawi thu kigelh teng lakah kim pen ding cih ahih pah loh hnangin, Sia Gin Za Go in Zolai Sim Bu Kum Sawmngiat Cinna (1913-1993) Souvenir sunga Khuado Pawi Thu agelhna-ah hih bangin pan hi.

"Tedim gam sungah Khuado akizat ciat hangin, lasak akipan bawlzia le gamtatnate kibang kimlo hi. Bang hang hiam cih leh, omna mun kibanglo ahih mah bangin i omna mun tawh kituakin gam min, khua min, lui minte tampi-in phui- sam, lasak leh gamtatna-ah kizang ciat hi. A kibang lo neng neng a om hangin, "Khuado ngeina kician om lo hi, ci-a ngaihsut ding hi lo hi. Khuado thu i gen a kibat kim lohna zong a thupit mahmahna hi zaw hi, ci-in ngaihsut ciat ding ka deih hi.

Thu Masa:  Khuado pawi i cih pen Zomite pawi neih thupi pen leh lim zat pen ahi hi. Hih pawi pen tuuk annlak khit ciang kibawl hi. Hih Khuado pawi bawl hun leh Vaite pawipi ‘Diwali Puja' leh Kawlte pawipi ‘Mithuun Puai' bawl hun kituak a, Khuado pawi i bawlzia tawh kibat mahmahna nei-in mei kide tek hi. Kawl leh Vai ten ‘Khuaimeivak' de in, Zomite in ‘Meilah' i de hi. Hih panin Zomite pen minampite mah banga ngeina zia leh tong kicing a nei i hih lam kilang mahmah hi.Tua banga ngeina zia leh tong kicing a nei minam picing kihi napi in, minam picing hong hisak I minam pawipi Khuado I neihna natawm a thei lo tampi ki-om ding hi. Minam Pau, lai, ngeina, pawi leh khanglui vante kician a nei lote minam picing kici thei lo ahih manin a it lo, a keem lo, a puah lote minam khangto suak ngei lo hi. Tua ahih manin Khangthak Zomite phawnna ding deihna tawh Khuado pawi thu kong kaikhawm ahi hi.

A Khiatna:  Zo pau-ah 'KHUA' cih in khiatna nam tuamtuam nei hi. Pasian genna in ‘Khuavak’ kizangin, Dawite genna in ‘khuazing’ kizang hi. ‘DO’ I cih in zong khiatna nam tuamtuam mah nei-in, a sia lam leh a hoih lamin kizangkhawm thei hi. I it I ngaih hong zin hong lengla a om ciangin zin do, lengla do ci-in ‘Do’ zatna mun om mah bangin, hong bawlsia thei dawi leh gaalte I sim ciangin zong ‘Do’ ci-in zatna mun mah om veve hi. Zomite in ‘PAWI’ I cih pen Mikangte in 'Festival/Feast,’ ci-in, Kawlte in ‘Puai' ci-in, Vaite in ‘Puja’ ci-in leh Mizote in ‘Kuut’ ci uh hi.Hih thute panin Khuado pawi pen thupha hong guan Pasian dona, lungdam kohna leh thupha ngetna pawi hi-in; A lang khat lamah hong bawlsia thei dawi leh kaute lak pan kisiansuahna dinga dawi leh kaute hawlkhia-a dona pawi ahi hi.

A Kipatna:  Zo taangthu kante leh thugelh masate in Khuado Pawi pen Ciimnuai Innpipa Pu Tuah Ciang hun lai pek panin lim takin kizang khin dingin tuat uh hi. Bang hang hiam cih leh, Pu Tuah Ciang pen Zo ngeina zia leh tong a geelkhiapipa in kingaihsun ahih man hi. Tua ahih manin Khuado Pawi I neih zawh pen kum za guk peuhmah sawt khin ding hi. Khuado pawi pen khangthak ngeina zui-in Manipur gamah Tedim Chin Cultural Club makaihna tawh October 11, 1969 kumin Taang-nuam khua-ah zat kipanin, Mizoramah Zomi Society makaihna tawh November 12, 1994 kumin Sairang, Tlawng lui-ah kizang hi. Tuipi gaalkaai Zomi ten Singapore Zomi Innkuante makaihna tawh 1995 kum panin Singapore khuapi-ah 'Leitung Bup Zomi Khuado Pawi' min vawhin zat hong kipan toin,Bangalore ah Bangalore Zomi Fellowship ma kaih na tawh October ,2009 ni-in a nop thei pen in zang aa,tu ciangin leitung bupa Zomite omna peuhmah kizang kawikawi ta hi.

A Kizat hun:  Khuado pawi in “NI” nei loin a hun bek nei hi. Ahi zongin a hun pen kum sim September leh October kha sung hi hamtang hi. Bang hang cih leh, Khuado pawi pen tuuk ann lak khit cianga kibawl hi a, kum khat leh kum khat, khaw khat leh khaw khat, annlak hun a kigual lianlian theih loh baanah, khaw sungah mipite om kim lai paanga a kibawl ngeina ahih manin leh khawhun hoih hun (khapi taan hun) a kipaan ngeina ahih manin Khuado pawi “Ni” ding kiciangtan khol thei lo hi. Ahi zongin khuado ni ding leh vai khempeuh taangpi tawh kisai ahih manin hausa leh upate mah in a geel loh phamawh hi. Upate in a tunga I gen kal sungin ni khat seh phot uh hi.

Bang hang hiam cih leh khualzin gamvakte tua sungin hong tung kim thei le cih deihna hi.Lam khat panin Aizawl dan khawnga khuapite-ah Khuado pawi ni ding kician khat seha kipsak pen a kilawm lahna om tuan lo ding hi. Bang hang hiam cih leh, khamtung nuntaak ngeina dana annlak cih bang om lo hi. Tua ahih mah bangin Mizoramah Zomi Cultural Society in 1998 kum panin Khuado ni dingin September 25 ni sehin kipsak hi. Manipur Zomite in bel October 2 ni seh uh hi. A hang in, October 2 ni pen India makaipipa Mahatma Gandhi pianni phawkna ni holiday hi-in mi kim hun awng neih ni khat ahih man hi. Hun khat ciangin leitung bup Zomite in a ni kituakin khuado pawi I zat hun hong tung lai ding hi.

A Tukhawm Teng:  Khuado pawi pen I Zo pawi thupi pen leh lim zat pen ahih mah bangin hihna, ngimna, deihna tuamtuam tawh a kidim, a nuaia bangin tuunkhawm tampi a nei ahi hi: 5.1 Kum Khen Pawi: Zolai sim bu sungah “K, Khuado pawi - Kum khen pawi” ci-a a kisin mah bangin Khuado pawi pen Zomite kum khenna hunpi khat ahi hi. Hih pen a kitelna dingin khanglui ten “ la I cih pen thu hi,” a cih bangin Khuado pawi-a kisa la dawng khat en sai le hang:

(A)  Kum kikhen e, solkha dang e,Ziin in a vang khua zong hen aw,
(B)  Ziin in a vang khua zong hen aw,Sian sung tui bang siang hen aw,
(A)  Tu kawl tawi kum khua I khen a,Ningzu khum leh aisa aw e,
(B)  Ningzu khum leh aisa aw e,Khan kum sawt ciam lai leng e,             

Hih la in Khuado pawi pen Zo kum lui leh kum thak khenna a hih lam kiciansak hi. Tuhun ciangin Mikang hun khenzia 'Gregorian Calendar' zui-in kum lui beina December 31 ni leh kum thak kaina January ni 1 ni dan I zuih zenzen hangin, Zo kum lui leh kum thak khenna pen Khuado ahi hi.

Anlak Pawi:  Khuado pawi pen Annlak Pawi zong kici thei hi. Bang hang hiam cih leh Khuado pawi pen tuuk annlak khit bek cianga a kibawl leh tua ann thak khai thakte muanga a kibawl hi a, kum khat sung tawntung I khawh I ciinnate pana hong piang thupha khai leh ann tuamtuam aihna leh tuate hong pia, hong siam pasian tungah lungdam kohna in a kizang pawi ahi hi.

Khuailak Pawi: Khuado pawi cianga a min thang mahmah khat pen Khuailakna hi. Khuado khuailak i cih ciangin a kimawk lak hi loin, khuaibu (khuaipheng) panin hong tung ding kum pen kum hoih ding maw, sia ding; kicidam ding maw, kina ding cihte theihnopna-a aisanna in a kizang ahi hi. khuaibu leh a note omzia panin kum thak sunga mabaan ding kithei thei ci-in khangluite in ngaihsun uh hi.

Meidet Pawi: Khuado pawi a vaamsakpi pen meidetna ahi hi. Khuado ni masa pen meilah lak ni-in kizangin “Meilah lak ni” a ci zong om hi. Hih meilahte pen pawi sung teng tawntung lim kizat mahmah hi. Dawi leh kaute dona (kaubetna, meidetna) a kipan khawsiam pasian a vaak tawh donna in zong a kizang, a kitangsak, a kivaak zihziah ahih manin khuado pen Meidet pawi zong cih theih hi.

Siansuah Pawi:  Khuado pawi pen siansuah pawi zong ahi hi. I pu I pate in mihingte a nasak, a sisak leh mihingte tunga tuahsiatna tuamtuam a tungsak pen dawi leh kaute gawh uh hi. Tua dawi leh kaute tawh a teengkhawm hi dingin kingaihsun lai uh hi. Khuado cianga 'Kaubetna' leh 'Meidetna' in a ngiimpi pen zong mihingte a bawlsia dawi leh kaute notkhia-a innsung, khuasung, gamsung siansuah ahi hi.

Thukhupna: Zomite Kumlui leh Kumthak Khenna, kum khat sung tawntung I sep I bawlnate-ah thupha hong guan I biak Pasian kiangah lungdam kohna, mailam ading Thupha ngetna, Siatna hong tun thei Dawi leh Kaute tawh I kipelh na’ng leh eimah-mahah I hoih lohnate tek pana i kisiansuahna ding hun thupi ‘Khuado Pawi’ bawl pen Khristian ngeina leh Pasian deihna tawh kikingkalh lawmlawm lo cih I phawk thak ding deih huai mahmah hi.Khangthakte in Khuado pawi I zat ciangin, I pu I pate in i khanglui hun lai leh i Zo ngeina tawh kituaka a zat danun kizang thei nawn lo hi.

I theih ding thupi-a ka ngaihsun pen Khuado Pawi I zat ciangin Khuado Pawi‘ a khiatna leh a deihna ngaihsunin, tua leh i khristian biakna leh tuhun tawh kituakin leh I omna mun tek tawh kituakin I zat ding kisam sa ing. Tuhun ciangin Zomite leitung mun tuamtuamah ki-om ta a, ‘Ngeina kician neite - Minam kician’ a hih mah bangin I omna tekah I Zopawite khahsuah loin keemcing in, Zuunin, I thupi bawl ding kisam hi. 

By: Zam Do Nang 

Comments/Ngaihsutnate (0)add comment

Write comment/Na ngaihsutna gelh in
smaller | bigger
password
 

busy

TONGSAN Video

TONGSAN Photo Gallery

TONGSAN Weekly Journal

Who's Online

We have 755 guests online
Joomla Templates and Joomla Extensions by ZooTemplate.com