Tongsan Pen Award 2011 Winner pulakna

Last Updated on Wednesday, 22 February 2012 21:20 Written by Admin Wednesday, 22 February 2012 20:59

Leitungbup Zomite sungah Zolai tawh Nipi kalsim Thukizakna khat ahi " Tongsan Weekly Newsletter " pen Pasian huhna le mipite' thapiakna tawh kum 7 sung hong cing ta hi. Hih Tongsan laihawmna pan adiakdiak in Kawlgam sung a om laisim nu le pa, sanggam U le naute in theihloh kalin khuamuhna le khantohna tampi kineihlawh cih mit muh ahi hi.

Tongsan laihawm ( Newsletters) bek hi loin, adiakdiak in gamdang lam a om Zomite manlang tak a thukizaktuahna nei-in, kimeltheihna leh Zolai  itna  akhan semsem na ding lunggulhna tawh abeisa 2009 kum akipan " Tongsan Mailing group "  This e-mail address is being protected from spambots. You need JavaScript enabled to view it kipankhia a, tu in kum 3 sung a lut ding hi ta hi. Hih hun sungah nisim, hunsim in Zomite in thukizakna phualpi khatin kizangh thei ahih manin, mun tuamtuam a om Zomite in phatuamna tampi mah kineihlawh cih kithei hi.

Tongsan mailing group tungtawn in Group member te in nisim naisim in thuthak, Thului ( article) le thuleng tuamtuam asim theih denna ding deihsakna tawh laitam khahkhia pen / laigelh siampente abeisa 2010 akipan " Tongsan Pen Award " pahtawina laipi leh US$ 50 piak dingin kikhensat hi. 2010 kumin laigelh siam mi 20 kiteelkhia (Nominee) a, Tongsan Website tungah Online Poll kibawlin Voting System tawh mipi kiteelsak hi. Nominee mi 20 sung panin Dr. Hau Za Cin , Singapore in Voters - 165 sung pan Votes (43) tawh " Tongsan Pen Award 2010 " lungkimhuai tak hong ngah ahih manin, kum (63) cinna Zomi Nam Ni, Tongsan Award Committe tangin Pa Vung Suan Mang ( International Tongsan Consultant, Singapore) in piakkhia hi.

Tua mah bangin " Tongsan Pen Award 2011" ading mi 15 kiteelkhia leuleu in, Tongsan Website tung mahah mipi kiteelsak a," ZOMI DAILY TEAM " Malaysia te in (post 90 kim)50.4% tawh  hong ngah ahih manin, Tongsan Award Committee thukhensatna om bangin " Tongsan Pen Award 2011 " pahtawina laipi le siamman US$ 50 mah kikipsak in, Tongsan Award Committee tangin Tg. Kam Sang le Tg. Kham, ( Malaysia Tongsan Agent) te in Zomi Nam Ni- hunpi sungah piakhia uh hi. Tutung Tongsan Pen Award 2011 lungkim huai tak a hong ngah ZOMI DAILY TEAM te Tongsan Media Group pan lungdampihna i puak hi.

Lungdamkohna:

(1) Tutung Tongsan Pen Award 2011 pahtawina hong piakkhiat sak Malaysia Tongsan Agent ahi Tg. Kam Sang le Tg. Khampi ( Secretary of ZAM) te tungah Tongsan Award Committee min tawh lungdamna lianpi kinei hi. 

(2) Abeisa Tongsan Pen Award 2011 piakna pen All Chin kipawlna Chin National Day, Singapore ah kipiakhia in, tukum zong ZAM makaihna tawh Zomi Nam Ni hunpi sungah piakkhiat theihna ding a deihsakna le thupi khualna tawh hun awng lungkim huai tak a hong pia ZAM makaite le Zomi Nam Ni piangsak Committee te tungah lungdamna lianpi i pulak hi.

(3) Award Certificate a hoih pen le etlawmthei penpen dinga hong bawlsak ahi Tg. Mungpi (Paukxi,) Malaysia tung zongah Tongsan Media Group min tawh lungdamna i nei hi. Topan a maute' tungah azah tampi thupha na piaksak hen.!

Thumna le Zaksakna:

Tutung Tongsan Pen Award teelzia /piakzia tawh kisai mipi lam pan muhna le ngaihsutna kibanglo cihte akipan hawm thawhna tuamtuam om khate Mipi lam pan kimaisak ding kong thum uh hi. Mai lamah Award  Winner teelzia le piakzia cihte nam tuamtuam ( Catagories) khen tohtoh lai dinga, kum sim mahin Tongsan Award kipia ding cih i kizasak phapha hi. 

Tongsan Award Committee

Headquarters,

Kawlpi, Zogam

Mexico gam Thonginn khatah mi 44 kithat

Written by Admin Tuesday, 21 February 2012 14:30

Mexico gam leilu lam Monterry khuapi a om Apodaca Thonginnpi sung khatah abeisa February 19,2012 ni-in thongkiate kitot/ kilaiina lianpi khat piangin, a tawm pen mi 44 si-in aliam abai kitheician nai lo cih kiza hi. Tua thongkiate' buaina bulpi pen Thong sung a tun ma un khamtheih guihtheih zuakna pan buaina nei ngei khin uh ahih manin, Thong sung pan kiphulkik in, khat le khat a gawl kimeklum tawh inn sung vanzatte zangin nasiatak kisat/ kitawngin uh a, kithahna ciang dong a piang hi ci-in Thongcing uliante gen hi.

Mihing hihzah asihtheihna ahang akan uh ciangin,Thongcingte in a pawlpawl in khen bawlin, akikhumna pan kidalna kongkhakpite hongkhia in khat le khat sutuah or kilai/ kibuansak sak uh hi cih upmawhna tampen hi. A hi zongin Mexico gam pen leitung ah khamtheih guihtheih zatui (Drugs) zuakna/ sumbawlna ( black market) minthang mahmah gam khat ahih manin, hih bang dan a, buaina le kithahnate pen a lamdang lua in kingaihsun nawn lo ci hi. Mexico gamah khamtheih zatui zuak nasem minthang Gulf Cartel Group leh Zetas Group kicite nihte khauhpai mahmah ahih manin, Thongsung dongah kilungkimlohna om lai hi cih kigen hi.

Thongkia kithatte i innkuanpih sanggam unaute in lunggim le kap ziahziah kawmsa in Thonginn pua lamah ngak zihziah uh hi. Thong ukpi Mr.Domene in agenna khat ah Thonginnpi pen mi 1500 om theihna ding bek akilam hi-in, mi 3,000 val kikoih ahih manin, mi kigak luatna tawh zong buaina tampi om tuam dingin gen hi. Tua banah Mexico gam Thonginnte pen khamtheih zatui sem, a zangh vive ahih banah mi gilo ,zatui hoihlo azuakte teenna phualpi khat zong ahi hi. Thongkiate kitotna le kithatna pen tutung bek hi loin, a, abeisa January,31,2012 ni-in Tamaulipas State, Altamira Thonginn zongah nasiatak kitotna hangin thongkia mi 31 mah sikhin ngei hi.

Source: Internet

Translated by: Pa Kham Khan Suan(Tongsan Translator)

Tanduai Khuapi ah Vanleng lauhuai takin tusuk

Last Updated on Monday, 20 February 2012 21:27 Written by Admin Monday, 20 February 2012 21:18

Kawlgam ah vanleng line thak khat ahi Kanbawzah Airline (Air KBZ)te' khualzin mite tuanna vanleng khat February 18, 2012 (Friday) ni (11:30 AM )hun-in Rakhine State, Tanduai khuapi Vanleng tual ah tu ding kim lai apei kia suk thei lo mawk ahih manin, vanleng taina lampi nawl lopa lakah awmtal in tusuk sak a, vanleng a kha langkhat kitan cih kiza hi. Kamphatna tawh sehnel kikoihna khat phusak kha ahih manin khawl thei pah bilbel ci-in, khuamite khatin khatin gen hi. Vanleng tungah khualzin mi 50 val tuangin, asi aliam kua mah om lo banah Vanleng meikang cih zong omlo ci hi. Kanbawza Airline pen Kanbawza Company neipa U Aung Ko Win neihsa hi in, abeisa April 1,2011 ni akipan Kawlgam sung khuapite ah khualzin kipansak cih kiza hi.

Translated: Tongsan tanute