sideBar



zomi aw lung lau ken!

NEWS Zomi News
BLUE GREY RED
Zomi News

ZYA Myanmar le ZYA India Makaite Kimuhkhopna Nei

PDFPrintE-mail

Last Updated on Wednesday, 11 September 2013 10:10 Written by Tongsan Admin Wednesday, 11 September 2013 09:20

ZYA Zomi Convention 2013 3

Kawlgam Zomite sungah Khangno kipawlna lianpen khat ahi Kawlpi -Headquaters pan Zomi Youth Association (ZYA-Myanmar) makaite le Nanphalong ZYA Unit makaite in India gam Manipur /Churachanpur, Lamka khuapi pansan a om ZYA General HQ. makaite tawh September 9,2013 ni-in Nanphalong AG biakinn ah Sim le Maal Zomi khangnote mai lam kalsuanzia ding holimna (Joint Meeting) thupitak nei thei uh cih Tongsan Reporter-Tamu tung pan kiza hi.

Hih Holimna hun ah India ZYA Hqrts. pan Pu T. Go Kho Mang (President), Pu Lian Za Lal (General Secretary), Pu Do Muan (Asst. Secretary)te kihelthei in, Myanmar ZYA Hqrts., lam pan Pu Kam Suan Mung (General Secretary), Pu Kham Do Dal (Treasurer), Pu Vungh Za Khup (Asst.GS 2) le Nanphalong ZYA Unit makai pawl khat kihelthei uh cih kiza hi. Tua kimuhkhopna ah Zomi Council malakna tawh hong tung ding October 25-27,2013 sung Lamka khuapi Public Ground ah kinei ding  " The 3rd World Zomi Convention" khawmpi vai tawh kisai holimna zong nasiatak nei khawm uh ci hi.

Hih khawmpi ah Myanmar lam pan Zomite a tam theithei akiheltheihna dingin ZYA Myanmar makaite in mipi sungah thacialna (Mobilization) nasiatak bawl ding cih genkhopna nei uh hi. Tua bek tham loin hih ZYA Myanmar le ZYA India makaite kimuhkhopna pen mai lam sim le maal Zomite sungah khantohna le kipumkhatna om semsem dingin lametna lianpi kinei cih kiza hi.

Reported by: Tongsan Reporter, Tamu

Posted by : Tongsan Media tanute

 

GZA Makaipi Tung pan Thuzaksakna

PDFPrintE-mail

Last Updated on Saturday, 07 September 2013 22:41 Written by Tongsan Admin Saturday, 07 September 2013 22:37

560850 484410971576730 117895901 a

Pasian hong piaksa ih Zogam ah aom Zomi khempeuh leh leitung muntuamtuam ah kikhen aom kongit Zomi te khempeuh tungah thu kong zasak hi. Ka pumpi dam loh na hangin kum khat sung phial ding bangmah kong zasak thei kei hi. Tu in note nong thungetsak na leh nong itna uh tawh noptuam zaw deuh kahi manin thukong zasak hi.

Amasa pen in lungdamna thu hong tun kum zawh 100 cin pawipi (Cope Jubilee) akipan khia GZA pen kei mahmah pumpi cidam lohna leh ginat lohna hangin ih lamet zahin hong gina pah zonailo hi. Ahi zongin anungkik leh abei ngei ding hilo hi. Akhua suaksa meivak khau sumit ngeilo a aawnsa pumpeng akuaitan ngeilo Pasian in aphutsa GZA cik mah hunin mitsak ngeilo dinghi.

Abeisa hun a kong zaksak sak sa mah bangin Zomite in eilehei ih kisapna ahi ZOMI min mah deih in bangmah tawh khek ih sawm kei hi. Ahizongin ei te tawh ngaihsutna akibang pah theilote galin sain neilo in amau dinmun zong ih tel sak pih ding kisam dinghi. Tangtawng akipanin Zomi ih puihpate pen thusau ngaihsun thukhual leh mipicing namte ih hihi. Tua ih puihpate’n picinna lungsim ei te khangah khah suah kha kei ni!

2014 kum ciangin ih Kawlgam sungah mikisimna (census) om ding a, tua sungah Zomi cih tawh ih kiciamteh ding ih lunggulh leh ih tuppen ahihi. Hih bang apian nadingin sep ding tampi nei kha ding hihang. Mun tuamtuam aom Zomi khempeuh aw ih bang apian nadingin na ngaihsut natek uh suah in hong hawm khia tek un.

Ih bang vaipi leh Zomi bup mailam ding kikupna nei dingin tu 2013 kum November kha sungin Tedim khua pi ah GZA makai khawmpi nei ding ahih manin nang mahmah zong hong hanciamin nong kihel hamtang dingin itna tawh kong sam hi. Hih GZA makai kikhopna tawh kisai in Thuzekpipa (General Secretary) Rev. Dr.Do Kham in hong tangko khia ding hi. Kongit Zomi khempeuh aw ih it ih ZOMI melhem lo in pulhkha lo in apalh semsem nadingin Zomi kim in lungsim picin tuhin thu tawh nuntak siam tek ni.

Tung Pasian in naom na muntek uh ah thupha hongpia ta hen!

Note hongit,

Rev. Dr. S. Pau Khan En

GZA Makaipi

7 SEP 2013

 
 

Korea Zomite' Kikhopna BMC Pawlpi Tin Jubilee Kibawl Ding

PDFPrintE-mail

Last Updated on Friday, 06 September 2013 18:39 Written by Tongsan Admin Friday, 06 September 2013 18:32

BMC Tin Jubilee Symbol-02

Pasian in Zomite leitung gam tuamtuam ah pilna siamna, sum leh pai zongin hong puakin, i tuntunna mun ciatah i Zolai, Zopau tawh kipawlna, biakpiakna cihte kinei ciat hi. Tua mah bangin Korea a Zomite in zong abeisa 2003 kum akipan in Bokdeon Myanmar Community (BMC) cih Zokam tawh biakpiakna kipankhia hi. Pasian makaihna tawh tu in kum sawm cing ding hi ta a, kum 10 cin phawkna le Topa tungah lungdamkohna Tin Jubilee (2003-2013) pawipi zong anuai amun leh hunte ah thupitak kibawl ding ahih manin, Leitung bup Zomi khempeuh in thungetna tawh hong phawk ciat un.

Amun : Bokdeon Presbyterian Church (Main Chapel) Bucheon City, Korea

A hun: September 29, 2013 (Sunday 3-5 pm)

Bokdeon Myanmar Community (BMC) kipatkhiat zia:

1992 kum pan kipan in Korea a om kawlgam mi (a diakdiak in Zomi tamzaw) Pasian thu tawh kipawl khopna( Community) ci’n Seoul khuapi lai zaang a om Sarang Presbyterian Pawlpi lian mahmah khat in mission khat in nei uh a, Doksan (Line No.1) ah shelter leh biak piakna kithuah thei ding Innkhan (apartment-2002-2012) lianpi khat hong kawmsak uh hi. Tua hun sungin Pastor 3 in Kha lamah hong makaih uh hi. Biak piakna sungah a tam zaw Kawl pau in phatna la kisa in Pastor ten Mikaang pau leh Korea pau tawh Pasian thugen in Kawl kam tawh kam kilet khia hi.

Tua hun laitak-in Sia Cin Lien Maang (Ko Maang) le Sia Cin Khan Kham (Khampu) in kam let ( Interpreter) sem uh hi. Kum sawm hong cin peet mah ciangin (1992-2002) a mau lamet bangin picing hong salo hiam, khawlna ding thu hong gen khiavat ta uh hi. 2003 January kha ciangin February kha tawp dong bek om thei dingin hong gen uh hi. Tua hun in makai Committee te lungbuai ta uh a, mun dang khat i zon kei leh kibuai mahmah ding cih thu tawh mipite kilunghimawh mahmah hi.

Tua banah ACTS sanga sangkah te sungah Pastor 4 omin tuate pen Rev. Thawnghlun ( Tamu) Rev. Khawlrokim ( Singlei), Rev. Thang Siam Lian( Phaiza), Rev. Ngul Khan Siam( Fartlang) te tungah bang bang ahi zongin, ACTS a sia 4 tengin Sunday a kikhopna Pawlpite kiangah hong gen kawi kawi hen la, Biakpiakna leh Shelter hong pia thei ding Pawlpi hong zong uh hen ci-in mawhpuakna kipia hi. Pasian in thungetnate hong dawng in Rev. Khawlrokim in Mikaangpau tawh hun a zatna (English service) a hi, tu dong hongkeem Bokeon Prebyterian Church te kiangah va pulaak khia pah hi.

Tua bangin a pulak ciangin Senior pastor pa leh English service (foreigner mission) teng leh ACTS sia 4 te kimuh khopna nei pah uh a, lunggulhdan teng pulak khia in kitangsap a hi Shelter leh biakpiakna mun piak ding kamciam hong pia pah uh hi. Mipite zong kilungdam lua mahmah in Topa tungah lungdam kiko ziahziah hi. A tom in gen leng a mukhiapi pen Rev, Khawlrokim hongsuak hi. March 1,2003 ni ciangin Doksan Myanmar Shelter panin Bokdeon (Myanmar Shelter) ah kituah in kigialk suak pah hi. 2003 a kipan in Zopau ngiat tawh biakpiakna kipan khia thei pan hi.

Zopau a biakpiakna bawl taktak ciang in Topa ompihnate hong kilang semsem in nuam kisa mahmah in tettikhaan tampi tak hong om pah hi. Sarang Pawlpi hong kep lai in Kawlpau vive tawh thu kigen phatna kiza zaw ahih manin pawlkhat kawlpau thei mellote a dingin Pasian thu kikham lo pian hi. Ahi zongin Bokdeonte kiang tun ciangin Zopau ngiat tawh phatna la kisa, thu kigenzaw ta ahih manin, tetti khanna, lungdam kohna hong tam semsem hi. Pasian hong piak i pau tawh biakpiakna pen a man phatna hong kithei semsem hi.

Bokdeon Myanmar Community (BMC) ah Pastor sem ngei teng: 

2003 : Rev. Khawlro Kim, Pastor Thawnghlun, Rev. Thang Siam Lian, Rev. Ngul Khan Siam

2004: Rev.Thawnghlun ( Senior) Rev. Ngul Khan Siam ( Assistant)

2005: Rev.Thawnghlun

2006: Pastor Dr. Khup Suan Pau

2007 -2010: Rev. Dr. Tual Lian Tuang

2011 : Rev. Cin Za Lian

2012 : Rev. Ngul Khan Siam

2013: Pastor Kam Hau Pau

Innteek Pawlpi Bokdeon Presbyterian te’n mission hong sep dan:

1. Shelter khat hong pia, mei bill, gas bil, tui bill, a sunga van kisam tuam tuam te hong sik

2. Kikhopna ding inn lianpi that nga( fifth floor) na hong sap sak

3. Kal sim antang Kg 25 ta hong pia

4. Khasim sumtang in 8 lahks ( 800000 won) hong pia den uh hi.

Hih bang danin S. Korea a om Zomite Pasian in a ma minthanna dingin hong makaih in a sawtlo in Tin Jubilee Magazine kibawl lai dinga, tua sung zongah kicing zawin kigelh ding hi. Topan mimal kim thupha hong pia hen.

 

Note tawh paangkhawm,

 

Rev. Ngul Khan Siam

Convener

Tin Jubilee Committee

Bokdeon Myanmar Community

South Korea

1350516095941

 
 

Page 87 of 284

TONGSAN Video

TONGSAN Photo Gallery

TONGSAN Weekly Journal

Who's Online

We have 312 guests online
Joomla Templates and Joomla Extensions by ZooTemplate.com