sideBar



zomi aw lung lau ken!

NEWS Zomi News
BLUE GREY RED
Zomi News

Tongsan Media pan Dahpihna Thupuak

PDFPrintE-mail

Last Updated on Thursday, 10 January 2013 18:44 Tuesday, 08 January 2013 19:47

Rev. Dr. G. Khamkam

India gam, Manipur State Zomite sungah Zomi biakna makai minthang leh ettehhuai khat ahi Rev Dr G. Khamkam (kum 83) in a teenna New Lamka khuapi pan January 6,2012 (Sunday) nitak lamin tawntung mun hong zuatsan in, January 8,2012 ni-in New Lamka Hanmual ah kivui cih kiza hi. Siapa in a zi tawh tapa 3, tanu 3, tu 28 leh tusawn 14 nei hi. A nusiat a zi a ta, a tute le pawlpi mi khempeuh tawh kibang in leitungbup Zomi Thukizakna " Tongsan International Media Group" pan zahtakna le Dahpihna thu i pulak hi.

 Siapa pen Churachanpur ah Zomite' LST sang minthang  Grace Bible College ah Founding Principal (1981 - 1997) sung sem hi. 1954 -1957 sung Union Biblical Seminary(UBS), Yeotmal, India pan G Th. zo a, 1969 in BA, leh 1989 kumin UBS panin BD zo leuleu hi. Tua banah 1997 in Evangel Christian University of America panin thesis 'How To Study the Bible' cih thulu gelhna tawh Doctor of Ministry (D.Min) ngah hi.

 

Rev. Dr. G. Khamkam in laibu bu 33 gelh hi. Tuate: Bible Tangthu Bu Khatna (1962), Bible Thu Taangpi, Bible Thuhilh Poimawh Bu Nihna (1967), Bible a Numei Sawmngate (1969), Bible Tunbtang Thu,  Bible Zilna Kongpi No. 1 (1977), Exodus Laibu Suina Bu Nihna (1981), Halhna, Hindanhoih Bu 5na (1989), Hebrute (1976), I & II Peter & Juda Laikhakte Duina (1977), I & II Timothi, Tita leh Philemon Suina (1975), Intermediate, Laihawlpawl Zillai Bu , Itna Lamdang (1963), Khristian Hinkhua Bulphuh leh Kipsakna dia Poimawhte (2003), Khristian Innkuan (1965), Kilakna(Mangmuhna Suina (1978), Lungsim Damdawi (1964), Naupang Heutu Panpihtu (1981), Nehemia Suina (1978), Niteng Hatna (1992 a pan tuni dong), Niteng Mana (1966), Pai-Hin-Lish (1992), Paite Pau Sinna (1993), Panpihtu (1976), Panpihtu Nihna (1977), Philipi leh Kolose te Hilhchianbu (1973), Ruth leh Esther Suina (1977), Taangthu Lakkhawm (1970), Tangthu Hing (Thukhunlui Tangthu) (1989), Tangthu Hing Bu Khatna (1977), Thukhunlui Tangthu (1966), Toupa Jesu Gentehnate (1969), leh YCAR Kikhopna Pitu (1969) hi. Banah Paite Bible Translation nasepna ah ama bung masate ahih banah tua a Paite Lai Siangtho version tuamtuam kikhente ah a mapangpi hi den hi.

 Zomi sungah hici bang ciamtehtham biakna makai, laibu bawl minthang leh laigelhsiam (Zolai adinga i Aksipi ) khat ahih manin, sim le mal leitungbup a om Zomi khempeuh ading supna leh Dahna lianpi ahi hi.

 Dahpihna lianpi tawh,

 Tongsan International Media Group

Headquarters

Kawlpi, Zogam

 

Gullu Mual vai Zomite Hong Kikhembawl

PDFPrintE-mail

Last Updated on Wednesday, 09 January 2013 11:38 Tuesday, 08 January 2013 17:51

Photo

Zomite ading i gamh le go lianpen dingin i gam i leitang tungah Pasian hong piak ahi Tedim gam sunga om Gullu mual a Suang te pen abeisa hun khat lai-in, Kawl galkap kumpi' phalna tawh Sen (China) Company khatin tokhia ngei uh hi. Tua bangin i gam sungah namdangte in i neihsate ei phalna om lopi-in zawhthawh thu tawh hong sepnate hangin kilungkimlo lua ahih manin, gam le nam it Zomi makai pawlkhatte in Sen Company Project te lai gam pia-in kihawlkhia cih kiza hi.

Tu in zong Sen Company thak khat mah ahi (Asia Guiding Star Service Co.Ltd )te in sem kik dingin Kumpi thuneite tawh thukimna kibawl leuleu ta cih kiza hi. Tua Gullu mual tawhna ding vai tawh kisai Sen Company makaite le kumpi thuneite in Gullu mual kim ateeng Zomite' khua tengah Gullu mual tawh ding vai thukimna lai bawlpih in, zin kawikawi uh cih kiza hi. Tua bangin thukimna lai angah theih nading un khua mite khembawl in, a nuai abang in kamciam pia uh cih thu Pa Liantuang (Tongsan Endik lui) tungtawn in kizasawn hi.

Sen Companyte khembawlna Kamciam piakte:

1) Sang inn / Zato inn lamsak ding.
2) Lampi hoih mahmah.
3) Khua sungah Electric mei nuamtak ngah ding.
4) Nasep vaihawm sak ding.
5) Khua mite in nong ngetnop bangbang ngettheih dingin nawknawk uh hi.

Hih thu tawh kisai akizak ciangin lainatna le veiina tawh Pu Liantuang ( Tongsan Endik lui) le Siamsin makai pawlkhat Gullu mual kim a om khua 5 te ahi; Zonuamzang, Kimlai khua, Dimzang, Tuingo, Singgial khuate ah khuamite tawh kimu ding le thugenpih dingin zin kawikawi uh cih kiza hi.

Siansim makaite' zinna khuate ah a genpih thubulpite pen;

1 ) Companyte in EIA,SIA, cihte bangmah lakkhia se loin in khuamite khembawl ahihna.
2 ) Mipi' thukimna om kei leh Companyte in nasem theilo ding.
3 ) Gullu anei, a cing le a kemte in nitha ngahna le nasep ngah ding ciang bek hi loin sehtan/ hamphatna limci ngah huai.
4 ) Pasian hong piak thupha ahih manin i zat siam leh i minam bup ading thupha taktak suak ding cih thute tangkokhia uh hi.

Tua bang a zinna khuate ah Khuasung upa, hausate le khuanu khuapate akipan khuamite tawh holimna nasiatak nei khawm uh a, tua aholimnate uh Video Record tawh a sawt loin, kimuthei ding cih kiza hi. A phakzawh nailohna khuate zongah maban kalsuan sawm lai ahihna thu Pa Liantuang tung pan kiza hi. Tua ahih manin Zogam leitang ah namdangte' khembawlna tawh innteek sep sawmnate Zomi khempeuh kipumkhat in Topa tha tawh do mengmeng ni cih kihanthawn hi hang.

Thupuak: Pa Liantuang (Tongsan Edik lui)

 
 

ZCD Makaite Zogam ah Zumkhen Honna Nei Ta Ding

PDFPrintE-mail

Last Updated on Tuesday, 08 January 2013 15:44 Saturday, 05 January 2013 19:18

Photo

Zomi min pua party i neihsun ahi Zomi Congress for Democracy(ZCD) phualpi Yangon pan Pu Cin Sian Thang( Chairman of ZCD), Pu Gin Kam Lian (General Secretary),Pu Zam Mung (Asst.Secretary), Pu Kam Lam Khup, Pu Anthony Kap Khan Khual le Siamsin makaite in Zogam, Tedim khuapi ah ZCD Zumkhen (Branch) honna nei dingin January 8,2012 ni-in Tedim khuapi tung uh a, Tedim khuanu khuapate in nasiatak vaidawnna nei uh cih kiza hi. Tedim ah ZCD zum honna pen January 9,2012 ni-in nei ding a, tua khitteh Tonzang, Cikha khuapite zongah paisuak ding uh ci hi. Tua banah Sagaing Region sung Kawlpi le Kabaw valley-Tamu lam zongah ZCD Party zumkhen (Branch) honpawi (Opening Ceremony) nei kawikawi ding cih kiza hi.

Tua ZCD zumthak honna khuapi le munte ah makai ding le nasem dingin pawlmithak (New member) teelkik nawnlo dinga, abeisa ZNC hun lai a omsa pawlpi (member) te mah tawh kalsuanto suakpah ding uh cih thu Pu Gin Kam Lian in gen hi. Tua banah ZNC min lui pan ZCD minthak ah kikhelna le (Registration) bawl kiknate in party memberte tawh kizopna ah bang mah nawngkaina om lo cih thu gen hi.

Aman a genbehna ah, " Township /Myone khatah ZCD party memberte tawh nasemkhawm in manawt ziahziah dingin gen hi. Tua bek tham loin, tuni ciangciang ZNC hun a member luite banah ZCD party thakah member lutthak belpawl khangnote tawh kigawm members thak zong honpi khat mah kineikhin ahihna thu Pu Gin Kam Lian (GS-ZCD) in genbeh hi. ZCD phualpi(headquarters)te i tupna/ngimna(target)bulpi in hong tung ding 2015 Kawlgam kiteelna (Election) ading kiginkholhna ding sangin, A nihveina Panglong Conference lawhcin zawhna ding vaite ngaihsutpi in nei uh ahihna thu Pu Kamlian in gen hi.

Tua banah Zomi Congress for Democracy(ZCD) in abeisa nung kha sungin Chin Progressive Party(CPP) makaite le mualmi kipawlkhopna -Ethnic National Development Party(ENDP) te tawh Second Panglong Conference vai le mai lam kalsuanzia dingte nasiatak holimna neikhawm uh cih thu kiza hi.

Source by : Chin World & Pu Cin Suan Mang (ZCD Treasurer; Yangon)
Translated: Kham Khan Suan (Tongsan Translator)

 
 

Page 166 of 284

TONGSAN Video

TONGSAN Photo Gallery

TONGSAN Weekly Journal

Who's Online

We have 279 guests online
Joomla Templates and Joomla Extensions by ZooTemplate.com