TONGSAN || International Media Group

Last Updated on Saturday, 14 January 2012 21:43 Written by Admin Saturday, 14 January 2012 21:11

I theihsa ciat mah bangin Kawlgam kumpi thakte in panmun hong ngah akipan in, abeisa 1988 akipan tuni dong thu tuamtuam le adiakdiak in gamvai tawh thongkia ( Political Prisoners) atul asim a lomlom in, hong khahkhia ziahziah uh a, tutung in zong anihveina gamvai tawh thongkia mi vekpi 651 te January 13,2011 (Friday) ni in khakhia leuleu uh hi. Tutung akikhahkhiate sung pan adiakdiak in mualmi party makaite, 88 kum a sangnaupang makaite le 2007 kum Lutolte lungphona tungtang a thongkiate mah tam kihel pen hi.

Tutung a kikhahkhiate sung pan abeisa 2004 kum akiman Kawlgam thukanmangpi le Former Prime Minister General Khin Nyunt le atapa Zomite sungh pa le a lawmte (thukan) mi 100 val, Shan NLD party makaipi le CRPP lutangpi ahi Mr. Khon Thu Oo,1988 kum sangnaupang makaipi Ko Min Ko Naing, Ko Ko Gyi, Sai Nyunt Lwin, te banah Zogam salphate ahi Pu Kam Lam Khup ( Pu Chin Sian Thang, ZNC President) tapa le atupa Pu Kap Khan Khualte zong hong suakta uh ahih manin, Zomite' Pasian min i phat kawmin Tongsan Media panvaimuakna le lungdampihna lianpi i pulak hi.A hi zongin ( Rev. S.T. Hau Go) i tupa Pu Go Pian Sing pen thukiza nailo ahih manin, Zomibup in i omna ciat pan thungetna tawh mapang khawm lai ding hi hang.

Tua ahih manin gam le nam suahtakna le zalenna ( Pinling Agreement) bangin " Zogam leitang i ngah kik mateng ", kamdang khatin gen leng ( Pinlong Agreement) ngah kik theihna ding lunggulhna tawh kolbulh khaukhih athuaklawh Zogam Salpha teng zahtakna le pahtawina i pia phapha hi. Tutung a kikhahkhia salphate khempeuh lungtang khauhna le kipiak khiatnate pen leitung bei dong a mangngei nawn lo ding tangthu ahi hi. A diakdiak in Zogam salphate pen Yangon a innpi ah Zomi khempeuh in nisim sun le zan phialin lungdampih in lengla kitawlnga lo cih kiza hi.

Prime Minister lui General Khin Nyunt in agenna ah, " Hong khahkhiat uh nuam ing. A hi zong mai lamah gamvai tawh kisai tawlnga in pasian thu lamah kipiaksawm ing. Daw Aung San Shu Kyi i maban dingte ahih le thukimpih mahmah ing " ci-in gen hi. Min Ko Naing in agenna ah " thuman thuthak le ka upna ka nasepna hang tawh hong mat uh ahih manin, kum 2000 sung hong khum zongin ka lau kei hi " ci-in gen hi. Shan makaipi Khon Thun Oo in a genna leuleu ah " Thuman lopi le mawhna nei lopi a hong mat uh hi in, mawhna nei hi kha zen leng hong mat cilin hong kaplum khin ding hi " ci in thuthak saite tungah gen hi.

Tu akipan Kawlgam ki ukna hong kilaihto semsem ding kilamen ahih manin, Daw Aung San Suh Kyi in mai kiteelpi kik ah meekuang hong lui le Democrecy gam makai lutangpi hong ngah dingin mipi a tamzaw in kilamen hi. Daw Aung San Shu Kyi in makaipi hong ngah le Pu Khin Nyunt pen thudotpi khatin hong samkik kha ding cih zong gamvai kivaate in gen uh hi. Kawlgam kikhelna dingin Zomite thungetna agah i muh hun ding nisim in hong nai semsem ta ahih manin, Zogam lasa siam Sia T. S. Khai laphuah " Zogam leitang ngah kik mateng Khawl lo ding " cih thu hong tangtung pelmawh dingin upna i nei hi.Zogam salphate zong cidam khansauna le a maban om laite ah hangsan takin Pasian in hong zatsak semsem lai hen.

Pasian aw Zomite hong makaih in !

Source : Freedom News group, Irrawwaddy,Zomidaily, Pu Zokhup, Mizzima, Tongsan.

Comments/Ngaihsutnate (0)

Subscribe to this comment's feed

Comment/Ngaihsutna	smaller | bigger
Name
Email
Write the displayed characters/Atung a Security Image gelh in!
Subscribe via email (registered users only) I have read and agree to the Terms of Usage.
	Send Comment Preview