News

88 Sangnaupang Makaite Japan Hawh

PDFPrintE-mail

Last Updated on Friday, 12 December 2014 22:58 Written by Tongsan Admin Thursday, 11 December 2014 19:25

467059 10151016533853343 1040869455 oIh theihtheih sa 88 generation sang naupang makai lah a hi, Peace and Open Society makai lah ahi U Min Ko Naing le U Jimmyte tukum December kal masa sung Japan ong zinuh a, 7/12/2014 ni Tokyo ah Kawlgam innkuan tawh ki muhna-ah a thugente uh tom, kim, cing-in kong gelhkik hi. Amau gendan lian ka ciapteh dan-in kong hanciam hi-in Kawlgam gamvai thuluan ziadan a theinuamte’n a hi ciangkhat ki-en thei dingin ka lamen hi.

Min Ko Naing Thugenna:

Tuhun khangnote pen ko’ sang kivakna tampi nei zaw uhhi. Adiakdiak-in kampau nam tamtuam pau thei uhhi. Ko pen thong sungah kum tampi ong kikhum-in, lai cih mahmah a ki-sim kha ngiatlo hi. Tua bek thamloh mikang lai ‘A,B,C’ cihpen, tan 4 pan a kisin pan hilai hi. Tua khitteh tuhun khangnote pen technology lam zong kiva mahmah tahi. A thupi ah game khawng kimawl in hun na beisak loh dinguhhi. Khantohna, kilamna-in na neizaw un. Khat veivei ih kimlepam ah na manphate a khawnkhongin ih ngahteh man neitak-in kizang lo kha theihi.

Ka tuntunna-ah ka gendet thukhat ong hawmsawn kik nuam ing. Tua-in a ngaihsutna- thumna cih thuhi. Ngaihsut kikin-sittel kikna cih dinghi. Nunglam deuhin Scandinavia gam lamte ka van zinhi. Scandinavia (Sweden,Norway, Denmark) cih gamte pen a khangto, nuamsa, cilesa ngiat zong a ithuai dikdek ngiatte uhhi. Keizong vanleng sung ka tutteh vanleng nasemte nungak melhoih, ngumngek ding kasa kha hi. Banghang hiam cihleh Asia gam phadiak ah vanleng sung nasem nunghakte pen a meelhoih, khangno, ithuaite bek kizangin, a kum tam uhteh kikhawl sak lianlian hi.

Ahi zongin hih Scandinavia gamah vangleng a nasemte pen khangham putek, pitek vive na himawk uhhi. Upmawh na banglo hi. Banghang hiam cihleh amaute a kumtam uhhang companyte’n nasep khawlsak theituan lo uhhi. Vanleng a nasemte mahmah-in khialhna, mawhna, thanemna neilo pi-in nong tawpsak uhleh no a khialzaw hi uhteh, mawk thuaklo ding hi-ung ci-in, amau ngahtheih thu neihnate limtak zangkhia uhhi. Ka khangno lai-un ka guhtui tenguh ong sukkhiat sak dikdek, ka thate-uh ong zatgawp sak mangin, katek uhteh nong paihsawm uhleh kingah lo hi, na cipah lian uhhi. Airline company khatbang kumtam u hamte nasep a tawpsak uh hangin, a company uhmipite’n langpan a, khawllawh mawk uhhi.

Tua ahih manin mihing khat ciatin ih neih thuneihna(rights) te theih masak kul hamtang hi. Ih omna leh tuahkhak sate’ ukna sungah ih ngaihsutnate gakcip lo-in ih ngaihsutna- khan ding hihang. Ih neitheih thuneihna (rights) te limtak zangin, tua thuneihnatawh kizom vaipuakngamna (responsibility)te ih vomkul hi. Tu hunteh panmun kinak tuh luahi. Stage tungah ih tu lianluan zongin, hawkguam sungah ninhah ih hiphial zongin ih nnuntakpih thu-in banghiam cih thupi zaw hi.

Jimmy Thugenna:

Ih gampen thupiak ziauhziauhna(commanding) nuaiah kum tampi a omzawh sawt luahi. Tua ahihmanin ih ngaihsutnate kikhak mahmah hi. Ko Peace and Open Societyte pen Kawlgam mun tuamtuam, paizo kei unteh tawnglua mahmah a kicihna na gamtawng nangawn-ah ka na zin kawikawi uhhi. Private sang honkhat ah zong thu ong kigen sak a, khat vei keizong bangmah gennai lo-pi, na tel uhhia? ci-in ka dotleh sang naupang bup-in bangmah kigen nailo pen telmah ong ci mawk uhhi. Hih pen ih ngeina hoihlo khathi. Siate’n teldong laihilh dingsang, lesson zawh ding nak ngimlua uhhi. Kei mahmah zong tua system nuaiah a khangkhia kha khat ka hihi.

Kumpi sung mahmah ah zong sepding thu (2) bek omhi. Khatna-ah tungsiah pan thupiak bangbang ‘awleh’ cihna hi-in thu nihna-in, ong kisawl bangbang nuaisiahte sawlbehtheihna a hihi. Tua ahih manin hih lungsimte ih laih ding thupi hi. Kumpite a lungsim uh laih dingpen baih pah lo ahih manin mipite’n ih lungsim laih masa limlim lehang ci-in, mipite lungsim sungah laulohna lungsim ka na hanthawn kawikawi  uhhi. Ih theih gige ding khat ah, ei ong lauthawng saksakte pen a zah nih bangin ei ong laute na hizaw uhhi. Democracy ngeina ah a thupi mahmah khat-in, dotngamna/ hi ihsak keileh khiatngam na lungsim ahihi. Tua lungsimte ih pomdet ding thupi hi. Constitution zong ih khelnop leh ih lungsim khel masak kulpah hi.

Mipite' Dotna & Amau Dawnna

Dotna : A zenzen in Daw Aung San Suu Kyi a om nawnlo hileh mipite kuan makaih ding hiam?

MKN: Hih ngaihsutna pen kicing lohi. Tu lian laitak a hihleh bel Daw Suu pen ihmuan ih suan hi-in ama’ nung lunghiang lotak in zui mahni. Ahi zongin kong gennop in mikhat bek pummuan, vai khempeuh pumap cih pen hoihngiat lo hi. Mihing cih pen lungsim, pumpi a si, a beithei hi. Mi khatkia-in a tung penpan ukgawpna-sangin kei deihna-ah teamwork kisam hi. Makaih khop ding kisam hi. Hi theileh generational leadership kisam hang.

Tua ahih manin mi khatkia tavuan pumap sang ei-leh-ei zong kisin dihni. Suahpih siamna a nei ommah hi. Tua bangmahin na tampi kisin taktak lehang kisiam theilua hi. A min neikhollo, kuamah theih loh khat peuhzong makai pi ong suak vat theiziau hi. A thupi-ah ngeina hoih(System hoih) masak ding hoih sa ing.

Dotna:  Article 436 kipuah keileh bangcih ding?

Jimmy & MKN: Hih tawh kisai-in article 436 kumpite’n puahsawm keileh thu nih sem ding kigeel hi. Thu khatna-ah mibup kihel kimsak in, ngongtatna zanglo-in democracy kician ngahzawh nang ki hanciam suak dinghi. A nawng kai mahmah khat-in tu laitak kumpite'n puah ding lah cilo, puah lo ding lah cilo-in koih niangnuang se uhhi. 1988 lai hileh bel siang mahmah vethi. Kumpite' democracy zang lo ding, kiteelna omlo ding cih siang tak-in pulak uh ahih manin ki lungpho pah ziahziah in kumpi honkhat bang tawp lawh ngelhngelh uhhi. 

Dotna: 88 Sangnau pang makai, Peace and Open Society (POS) te tu laitak gamvai nasepna-kiampian kisa hi.

Jimmy: Thongpan ka suahtak tunguh gambup ah ka zin kawikawi uh a, network ka phuan kawikawi uhhi. Tun ahih leh vai tampi-ah Yangon a om ko kia sep hi nawnlo-in a khua,khua a-om makaite ka pantah uhhi. Ko mahmah zong suah tak ding lawptakin do (activist) ka hi uh a, gam lam nading khangthak, sithak sa thak mipilte mun ka pia nuam uhhi. Amau zong kiva mahmah ta uhhi. Regional leadership thupi sak ung. Ka let uh thu bul khat-in ‘we own our city’ cih hi-in, mun khempeuh-ah omloh phamawh thu (4) ka neisak uhi.

(1)    Kipawlna (organization) om hamtang ding.

(2)    Kipawlna khempeuh Kizopna (network) om hamtangding

(3)    Mipite’ thutheihna lapsang ding le khua-le-tui khantohnate semding (activity)

(4)    Thu kizakna(media) tawh kizom hamtang cihte hi.

Vai tampi-ah ko sese zong kullo-in, khangthakte muan huai mahmah hi. Zong nasep zo mahmah uhhi. Thu nawngkai a tamluat ciangin Min Ko Naing a kipan kongiat ka kihel pan uhhi. Tua ka sepna khempeuh zong ka pu lak thapai kei uhhi. Tu khawngin zong Kawlgam mun tuamtuam ah kido, kitotna, buaina tampite ah hih theih zahin ka va phelh uhhi. Ko-le-ko ki advertise khak ding ut lohman in gentha pai kei ung.

Dotna: Tualgal sungah minam neute’ ading bangmah genlo-in khutzep ding na hi uhhiam?

MKN: Hih tawh kisai-in, a piangsa thu gengen bel hoih keiven ong genkhia mai ning. Kei mahmah zong Mon minam ka hihi.Thong sung ka omlai-in ka lungkiat hun tampi om hi. Kei-le-kei tha kalak kik zeel hi. Thong sungah ka om laitak sang naupangte lah kihel thautawi minam khempeuh kipawlna Democratic Alliance of Burma kiphuan cih kazak in ka nuam mahmah, tha ka ngah mahmah hi. Gam tuamtuam ah zong galkapte a gensiat mahmah laitak hi.  Ahi zongin tua laitak-in galkap kumpite’n maipha deihna le lehpankik nopna tawh convention ong sam uhin minam tuamtuamte kihel hi cih paulam pong uhhi. Tua laitak-in minam neu thautawng pawl khat-in galkapte ong thukim-in ong pawlpih mawk uhhi.  Surrender (‘a lynn win’-kawllai) cih khawng ong omin galkap kumpite tawh kinak thuah mahmah mawkhi.

Tua laitak-in democracy ading a pang den ka lawmte uh thong sungpan ong suakta sak masa limlim un, amau lo-in thu kikum theikei-ni khawng na cile uh ka ut mahmah hi. Hih bang galkap kumpite tawh a kimuhna-uhin galkapte politik lam a nakzawh nading political exit a pia suak hiau hi. Tu mahmah in zong Federal system ih deih leh constitution puah loh phamawh hi. Article 436 puah lo-in constitution kipuah thei ngiatlo hi. Constitution puahnang mapan na-ah ong panpih le uh kilawm mahmah hi. Minam neute in ih right ading ma ih pan laitak mahin democracy ading-in a kiman, a kibawl siate zong ih phawkkul hi. Constitution puah ding mithial kha keini.

Thong ka om lai-in a suakta masa-sain bang kam na vaikhak nuamhiam ong ci-uh a, ‘Na khut-uh na hum tentan un. Na hon uh leh galkapte’n khut mete khat khit khat ong kuaihtan sak dinghi’ ka cihhi. A tuamtek-in ih tatteh galkapte’n noptak ongsa uhhi. Tu mahmah in zong thautawi makai teng man kizaih thapai pongin (picture politic) hi lelhi. Amauteng bang ki thukim cih peuhmah ki theikha lohi. Transparency omlo-in kido zeel, man kizaih zeel himai hi. Statement thoh ciang zong mi mawkmawkte’ teltheih dingin gelh ding thupi hi. Tua ahih manin, transparency le collective leadership kisam hi. Tua bek thamlo a thupi mahmah khat-in, minam neute sungpan ei tangding ong dinsak ding, ei ong represent ding makai teel ding kisam mahmah ta hi. Tua hun ding ong tung ngelngel dinghi. Tu khawngin a mi ding kiciat sak kulta hi. Tua hi keileh thu kikup kholhna ding vai galkapte’n a hun ong sot toto ding hi.

Dotna: Min Ko Naing aw, president ding ong kici leh na sawm hiam?

MKN: Min-le-za, tutphah cih limlim a ut lo hing. Kei bel laikhawng gelh, lim khawng suai leng a ut bek hing. Democracy taktak ngah nailo ih manin a do tentan lai bek hing.

Dotna: 88 generation sungah kithutuah na kiamta kici hi.

MKN: Ko sungah tutphah kituhna a kipan bangmah buaina omlo hi. Nasepna-ah kipiak zawhna cih khat bel omhi. Ko zong innkuan vai khawng neitek-in kha sum na ngawn tam kipia zolo hi ung. A diakdiak-in thong khiatthuak, suahtak nading-in a do khawm ko khat-le-khat ki-it, ki veina kuamah in ong telpih lo dinghi.

Dotna: Peace and Open Society te’n political party phuat sawm lo na hi uhhiam?

MKN: Hih pen ong kici mun mahmah-in, ‘party phuatlohna pen mawhna ahiam?’, ci-in a dong kik hi-ing. Party phuatloh phamawh hamtang cihbang omlo hi. Thu nih ngaihsut huai hi. Authority le Influence kibang lohi. Galkapte’n bel authority paksak mahmah uhhi. Ahi zongin mipite’n a hih leh a lungsim uh a la zote’ nung zui nuam zaw uhhi. Amau tawh ka kiteh kakna uh hi masa kei-in Martin Luther King a kipan, Gandhi te in zong party na phuan tuan lohi. Ahi zongin party phuante kuamah a ko hi kei-ung. Boyoke Aung San zong galkap pan tawp-in party a lutngiat khathi.

A thupi-ah party ah a lutte leh lutlote ih timing a kituah ding thupi hi. Vaipuak hawmdan siam-in timing kituak sak le hang thuman lohnate kizo theihi. Gandhi-in a mipite makaih laitak mahin Nero in party lam panmun la-un vai tampi tak na lem hi. Thuman lohnate ih do keileh ong hangsan semsem ding uhhi.

Dotna: President Thein Sein tawh Peace and Open Society na kimuhna uh-ah bang na kikum uhhiam? Kipiak sim na nei uhhiam?

Jimmy:  Kipiak sim cih peuhmah om kei. Ka neih uh leh zong siang takin mipi bup ong gennung. Ka kimuhna-ah ih gam political culture ah kimuhkhop, thu kikupkhopna dialogue culture a kisapna na gen ungin, kumpite’n bel bottom-up ki-ukna thu ong genuh.

Dotna: Peace and Open Society te sum-le-pai vaileh nasepna honkhat ong kigensia hi.

Jimmy:  Ko pen 1988 lai pekin gamdang huhna tuamtuam tawh nungta cih thuhilo tawh galkapte’n ong mindaisak nuam den uhhi. Tun zong tuamah hi. Open Society cih pen George Soros makaih Open Society Initiative huhsa hi ong kici hi. Ama huhna cih bang omlo hi. Hih ka min uh Open Society cih mahmah zong , Soros a hilo-in tu man kum 200 lai pekin a kiphuaksa idea khat a hihi. Soros tawh nih vei ka kimu uh a, huhna ka ngen keiuhhi. Khat vei kimuh kik ding ong kun-in, ka nial mai uhhi. Ka pawibawlna-uh khat-ah crony te’n sumkhia ngei uh a, hoih kisa lo ahih manin, tua khit ka sang nawn kei uhhi. Gamsung gampua a om mipihte huhna a hih leh lungdam takin kasang uhhi.

Ih gam politic dinmun gen ding hile hang tu laitak democracy adingin kihon buan ngeingai khat danhi. Kua’n democracy a ding pang taktak cih zong a kikhen thei paklo a buaihuai phial mawk dinmun hi. Mipite mitpil mahmah kul hi. Sniperte danin mui ngim takin ih galte ih kapsiam kei leh ei mi te kap kha lehang, sum mahmah ding hihang.

Dotna: Inter-marriage law le customary law tawh kisai.

MKN: Hih mun-ah gamvai le biakna vai, minam vai buai ding hun tungnai peuhmah lo hi. Tom gen mahmah le hang, thuman le thusia, thudik le zuauthu a kido toto hi-in a tawpna-ah thuman in zo ding hi.

Dotna: National Reconciliation cihtawh ki sai-in na koicih san hiam?

MKN:  Thong pan kong suahtak cil-in a minthang mahmah kammal hi-a, kei adingkammal thak khat hi. Ih mipi makaipite’n sisan luan loh theihtheih na ding deihna tawh a zuih khat uhhi. Ahi zongin tua paulam in dai khikhe det ding cihpen hoihlo hi. Manpha ih sak human rights, democracy thugilte a dang man olno taktawh khek huai lohi. Thuman lohna pen thuman lohna mah hilelhi. Ahi zongin ih galte a nungkik theih na ding uh lampi zong ih honsak kulhi. Hun kiciangtan khat ih koih kulhi.

Dotna: 2015 election na koi cih muhhiam?

MKN:  2015 election pen meileng bang hileh station khat bek hilel hi. Ih tupna kung hi nai peuhmah lohi. Ken bel kiteelna-pen thu thum tawh na en ing. (1) Constitution a kipuah hiam? (2) Electoral process, FPTP mah ong zang suakhiam? (3) A thupi makaite kim takin a kihel theihiam? Kimat, kikep ong zang zeel uhhiam?, cih thum tawh en ing. 2012 by-election ah panmun 40 val ciang kidemna lo siah kiteel-na limlim ka tuakha kei a, 2015 kiteelna zong upding hamsa sa mahmah ing.

 

Reported by: Lianpi (Japan)

Posted by : Tongsan tanute

 

KIIM Ministry in Cialpi & Seminar Nei Ding

PDFPrintE-mail

Last Updated on Monday, 08 December 2014 22:55 Written by Tongsan Admin Monday, 08 December 2014 16:32

10696392 900947556582685 7708040903325454413 n

Khan International Intercession Ministry (KIIM Ministry) makaihna tawh tukha Dec.12-14,2014 sung Christ Chapel,Oral Roberts University Tulsa, OK, USA ah Cialpi le Thusinna (Crusade & Seminar) thupitak nei ding uh hi. Speaker dingin Rev.David Lah le lasiam Naw Naw, Pho Phan,Nyi Puh Lay te in Pasian phatna la zai ziahziah ding cih kiza hi.

Tua laiah LST Isaiah 44:22 " Kei Kiangah Hong Ciah Kik In " cih bulphuh in kinei dinga, Cialpi le thusinna ah pawlpi le upna deidan loin a ut khempeuh kipai thei ding ci hi. Sum pai nek le dawn khempeuh KIIM Ministry in vaipuak nei ding cih thu Siamah Nu Khan ( Founder & Director of KIIM) tungtawn in kizasawn hi. Hih Cialpi le thusinna hangin, adiakdiak USA gam sunga om Zomite khalam picinna le thupha ngah behna suak dingin thungetna phawk ciat ni. KIIM Ministry zong Kha siangtho in ompih in, Khrist kumpi gam a zaisak semsem Ministry hi ta hen,.

Reported by: Nu Khan (KIIM), USA

Posted by : Tongsan Media Tanute

 

 
 

Kum 125 le Kum 50 Cin Pawipi Khaam Ding

PDFPrintE-mail

Last Updated on Monday, 08 December 2014 23:04 Written by Tongsan Admin Monday, 08 December 2014 15:27

10848021 828492183880365 313541998381914605 n

Kawlgam ah Lai Siangtho hawmkhiat nasep akipat zawh kum 125 cin (1889-2014) le Bible Society min tawh a din zawh kum 50 cin (1964-2014) lungdamkoh kikhopna pawipi pen tukha December 13,2014 (Saturday) ni ciangin Kachin Baptist Church, Sanchaung-Yangon khuapi ah thupitak kibawl ding hi. Tua laiah abeisa kum 50 sung BSM ah makai sem Chairman, Vice Chairman, Treasurer, General Secretary, Retired staff a vekpi in mi 36 om a, tuate pahtawina kipia ding ci hi.

Tua banah Pawlpi le biakna kipawlna tuamtuam 36 te zong kipahtawi ding hi. Gamdang lengla (zin thupi mi 5) kihelthei ding ci hi. Tua pawipi sungah Lasa ding pawlpi 3, Lai Siangtho lotgen dingin pawlpi khat cih bangin abaihsa in om khin cih thu Rev. Khoi Lam Thang (GS/ BSM) tungtawn in kizasawn hi. Hih pawipi tawh kisai vaihawmna ah adiakdiak in Rev. Khoilam le naseppihte khempeuh Topan cidamna le mavanna hong piaksak hen la, Thupina khempeuh Topa mahin ngah/ tangh hen.

Source: Rev. Khoi Lam Thang (GS/BSM),Yangon

Posted : Tongsan Media tanute

 
 

Page 3 of 696

TONGSAN Video

TONGSAN Photo Gallery

TONGSAN Weekly Journal

Who's Online

We have 597 guests and 1 member online
  • khampeek
Joomla Templates and Joomla Extensions by ZooTemplate.com