sideBar



zomi aw lung lau ken!

NEWS
BLUE GREY RED

News

UN Khawmpi pan Nu Ningpi Thupulakna

PDFPrintE-mail

Written by Tongsan Admin Friday, 10 April 2015 21:32

10155513 1056482087711660 489688560685751518 n
Zomi Innkuan USA kipawlna tang’in Zomi min tawh UN Numei Khawmpi ah akah Nu Zen Khan Ning (Sianu Ningpi Gualnam) in Khawmpi a kahna thu leh a tuahkhak thute pulakna (Report) tom kimcing anuai abangin nei hi.
 
Zomipih kkhempeuh,
 
Hih UN Numei Khawmpi pen “The 59th Session of the Commission of the Status of Women/Beijing +20 (2015)” kici a, UN Kipawlna sung a gam tuamtuam pan akah Numei Makaite leh UN ECOSOC ah Consultative Status angah CSO/NGO kipawlnate akah thei ahi hi. Zomi Innkuan USA kipawlna inzong Consultative Status hihna tawh Tangmi akipuak thei hi a, Zomi-te thu ahi zongin, Kawl gam thu ahi zongin, hih Khawmpi thulu tawh kituak thute a sung thei, a pulak thei, a kum thei ahi hi.
 
ZIUSA kipawlna tang’in Khawmpi akah dingin akicial numei makai pawl khat sung pan, Zomi numei makai (6) leh ZIUSA EC pan makai khat vakah zo hi. Khawmpi akah Makaite pen ZIUSA kipawlna min tawh sum leh paai a kisik zo hilo a, gam leh minam a itna uh, Zomi numeite dinmun a khualna uh, kipawlna a deihsakna uh tawh hon
 
Reports on CSW59
Zomi Innkuan USA 

Kumsim in Numei (aneu alian)te khantohna ding vai tawh kisai thu le la tuamtuamte UN zumpi, New York khuapi ah kibawlden hi. Gam tuamtuam pan numei makai a tul a sim ki kaikhawm in amau gamtek panin Numeite khantohna ding bang teng vaihawmna nei uh aa, bang teng semkhia khin uh aa, bang sep ding om lai, bang thu tuakkha, bang kisam cihte kikup khopna leh kilawmtatna ahi hi. 
?
Tu kum in, Leitungbup Numei Makaite Khawmpi khat ahi, a 59 veina Commission of the Status of Women/Beijing +20 (2015) khawmpi ah Zomi min tawh ZIUSA kipawlna Tangmi, Zomi Numei Makai (7) vakihel thei ung. Kawlgam pan in Dr. Dim San Nuam, Siama Man Cing, Siama Ciin Vung te zong hong kihel thei uhhi. USA gam sung pan in Siama Zen Khan Ning, Siama Ngai Zen Cing, Siama Don Ngaih Lian leh ZIUSA EC pan Pa Thang Do Hang cihteng ka hi uhhi. 
?
Hih khawmpi pen March ni 9 – 20 sung hi mah leh annek tuidawn, taxi man, hotel man, vanleng man te ei leh ei anguai tawh ki pai ahih ban ah vaai ki nei tek ahih manin a tawp dong ki om zo lo suak hi. Bangbang hi leh Zomi Numei te ki hel theihna sunsun ahih man in neih leh lam picing kei mah taleh mite in bangci bangin nasem, mapang uh aa a gam ciat vuah bangci nasep uh, bangci vaihawm uh cih te ei Zomi te in zong bangci leng Zomi Numei naupangte makaih thei ding leh amau’ii Mihing Thuneihna ah lamman tawh paipih thei ding cih te va mu, va za bek hi loin kum tampi mah a semkhia khin mite tawh bangci bangin mapang khawm le hangh mite’ gualzawh tantan en’ zong ban zo, sem zo ding cih lunggulhna hi pi pen ahih manin March ni 9–11 ni dong hunnuam tak hong zangh sak Topa min ka phat masa uh hi. 
?
Ka paina uh thu tomkimcing in hong gelh ing. Laisim a kuamaciat Topa in thupha hong pia henla, Zomi te maban ah deihsakna leh lainatna tawh ma a pang thei tawntung dingin hong siam ciat tahen! 
?
Sunday March 8, 2015 

Kawlgam pan hong pai Sianute leh ZIUSA tangmi Siama Ngai Zen tawh International Women’s Day Parade (Leitungbup Numeite’ Ni) ah zong thalawp, lunglawp takin nakuankhia zo uhhi. Tua ni mah in Siama Ngaih Lian leh Siama Ningpite a omna tek pan un cidam in New York nitak nai 5 in hong tung thei uh aa, Hotel ah van nga in UN zum ah registration bawl suak thei uh hi. 

Monday March 9, 2015 

Zingsang nai 9 in UN zum pi ah Zomi Numei Makai te ki tuntuah in kimeltheihna hun nuamtak zatkhit uh ciangin CSW59 honpawi hun hong cingta ahih man in Conference Hall ka zuan uh hi 
?
Thugente leh a Thute Tomkim cing: 

Under Secretary General Ba Ki Moon in tom kim cing mahmah in a nuai aa thu te hun hon na ah hong gen hi. Kum 1995 in Beijing Declaration and Platform for Action cih thulu tawh Numei te bangci bangin lamsang thei ding, bang lampi zangh ding cih te om khin hi mah leh kum 20 bang pai khin sungah nasepna te "unacceptably slow" upzawh loh in zekaai mahmah mawk hi ci hi. Mihing 100 ah 50 in amau septheih/hihtheihna a neih lam a theih kei uh leh 100 ah 100 ii ngimna te tangtung ngei lo ding hi. Numei te pen gal lak, sa lak; innkuan sung buaina leh nasepna mun te ah ki deidan na cih vangik te a lim puak pen te a hi uh hi. 
?
Numei te haksatna/bawlsiatna thuak (victim) te bek hi lo in khantohna ding mainawtna ding te ah mapang te hi zaw uh hi. Numei naupangte thapia in makaih le hangh khantohna dingah mahial siam; thubuai/thunawngkaai te ah thu minsiam; leh khangno te lak ah thu leh la gamtat hoih lo te a so kik/hin’ kik loh na ding a daltan zo thei te zong ahi uh hi. 
?
Kum 2015 pen Numei Pasal liangko kikim aa khantoh na ding leh ki kheelna lianpi a om na ding in Numei te pen I vaihawmna khat peuhpeuh ah ki helsak in thupi bawl in lamsang ni. Political Declaration adopted by the Commission in zong Numei Pasal liangko kikim na ding nasep te zong a zekaai zia leh tu ni dong mah in Numei te nenniam na nasia mahmah lai a hih na lim gen mahmah uh hi, tua ahih manin kum 2030 ciangin hih Numei Pasal Liangko kikim na ding ngiimna a tangtun taktak na ding in khut kilen in mapang khawm ciat ni! Phumzile Mlambo-McGuka, Under-Secretary-General for Gender Equality and the Empowerment of Women and Executive Director of UN-Women in Numei Pasal Liangko kikim theihna ding nasepna tampi mah om khin hi mah leh ii ngimna te zung thukpi kha in ki khel na taktak om thei nai lo hi ci hi. 

General Assembly President Sam Kutesa (Uganda) in numei te pilsinna, numei te cidamna lam ah khantoh na tampi a om mah bangin numei naupangte in innkuansung buaina le gal le sa aa matna, buanna, thahna te nasia tak in thuak lai uh bek hi lo in, innkuan sung, gamsung vai ah thu khensat theihna a bit nei thei nai lo uh ahih man in tua te ah nasia tak in ma pan’ ding gen hi. "Ei teng hi lai ah I ki kaih khop na pen Nasem ding aa ki kaikhawm hi hangh" cih tawh Commission Chair Kanda Vajeabhaya in mipi lungsim hong la in Numei Pasal Liangko kikim ding mah lim gen hi. 
?
Patricia B. Licuanan, Minister for Higher Education of the Philippines in ahih leh kum 1995 kum Beijing khuapi aa ngimna te sepkhiatna a om tampi te ah bang zahta in angtan’ huai, sep ding a om lai te lak ah sep theih pah ding te ah thalawp taka sep khiat ding, sep lai ding te zong sepsa te lampi tawn lo zaw in lamthak zong aa a hoih zaw, a zang’ zaw aa sep khiat mengmeng ding leh bang ci sep ding cih lampi tampi I muh sa te zangh’ aa thasial lo aa mapang ding hangh aa Beijing lai aa I lawpna lungsim te satsuah kik ni cih tawh mipi hanthawn hi.
?
Lydia Alpizar, Executive Director of the Association for Women’s Rights in Development makai pi nu in zong ki tuam bawlna, ki tuam paihna, numei khangcing leh numei naupang te deidanna leh kumpi thukhun hoih lo tuamtuam paikhia aa Khuahun ki kheelna te ah hi ta leh, sum leh pai zon’ na te ah leh, gamsung ki pawlna tuamtuam te ah ki deidan na om lo in numei naupang te kemcing leh launa pan lungmuanna ah pai pih ding lim gen mahmahhi. 
?
Europen Union tangpi (kusa) aa hong pai Marite Seile, Minister for Education of Latvia in "Koi gam mah in Numei Pasal Liangko Kikim na tatak ngah nai lo hi, ahih hangin gam khat ciatin i thuak, i phut khak leh i gualzawhna om sun te gen ding nei ciat ding hi hangh". Leitungbup ah khang khat in khat vei peuh mah Mihing Thuneihna leh Numei Lapsanna (Human Rights & Empowerment of Women & girls) hun om veve aa, tua hun sung ah MIHING thupitna bulphuh in kilungtuak tak in mapang khawm le hangh Zawn’ Luatna (extreme poverty) te zong I khangin a bei mang thei bek hi lo in, Mihing Thuneihnate hong picing dinga ki deidanna te hong mang ding hi. 
?
LYDIA ALPIZAR, Executive Director of the A ssociation f or Women ’s Righ ts in Development , in hi lai ah I ki kaihkhopna ah minam deidan lo, biakna deidan lo, numeipasal deidan lo in gimpipi tawlpipi mah aa deihsakna tak tawh na a sem numei tampi takte pahtawi na hun hi sak ni. Gallak, salak mai ah nasem numei tampi tak te’n anuntakna ta’n lawh uh hi. Numei naupangte’ Mihing Thuneihna (Human Rights) a cingtaak taka ngah theihna dingin a bit ki piakkhiatna leh sepkhiatna kisam mahmah hi. I ngiimna a tangtun na dingin a kisam sum le paai te leh deihsakna tak tawh a sem khia ding mi tampi ki sam lai hangh. A mual leh guam zui in I ngeinate hangin nasep na zong deih bangin taangcing pah samsam lo ding hi mah leh lungkia lo aa I sep pai suak ding leh mipi te pilpiak ding thasial lo in sem khawm ciatni! 
?
Tuesday March 10, 2015 (zingsang lam) NumeiPasal Liangko Kikimna, Numei Thuneihna leh Numei Thahatsakna te Taangci’n Theihna Ding (Realizing Gender Equality, Women’s Rights & Women’s Empowerment) cih tawh kizui in ka zaak uh thute tomkimcing in anuai ah na sim in. Hih side event ah Moderator a seem Radhika Balakrishnan, PhD, Faculty Director Center for Women’s Global Leadership (CWGL) in hun honna ah ama vei mahmah ahi Pilna (Education) thu bulphuh ding tawm khat mipi hanthawtna hong nei masa hi. Pilna sin ding tampi tak om aa, sang pan I sin pilna, inn pan I sin pilna leh lawm leh gual te tawh ki thuahna pan I sin pilna, namdangte, biakna tuamtuam te pan I sin pilna cih PILNA nam tampi na om hi. Tua I sinkhak, I muhkhak pilna te lak ah Thuneihtheihna zong na ki hel tawntung hi mah leh Thuneihtheihna (RIGHTS) cih pen banghiam cih I tel kei aa leh I mu thei kei ding hi.
?
Maria Cristina Perceval Ambassador and Permanent Representative Permanent Mission of Argentina to the UN Panelist in Numei naupangte in bang Thuneihna (rights) nei uh hiam cih a thei lo gam tampi om lai ahih manin tua te pilna I piak ding I vaipuakpi pen ahi hi. Numei te a niam zaw tuan ding aa hong ki bawl hi lo. Numei te in zong pasal te mah bangin pilna sin theihna thunei uh hi. Numei te in zong hansan takin a dik lo, amaan lo te ah a ding ngam, a gen ngam leh a pulaak khia ngam te ahih ding uh ki sam hi. A thupi pen ah Numei te in bang thuneihtheihna nei uh hiam cih PILNA piak ding I vaipuak hi. Argentina ka gam vuah zong Pasal te in thunei lua ahih man in Numei te aw koi mah ah ta zo lo hi. Tua pen damdam in hong kiheihei ta ahih manin Argentina ah zong kikhel theihna hun hong om ta ahih leh no gam, no lei ah zong om thei ngei lo ding kici thei tuan lo hi. A om theihna dingin hi lai aa om no teng khatciati vaipuak hi. Na veng na pam ah, na pawlpi sungah, sangte ah nasia takin pilna piak ding hong hanciam un. A kisam sum leh paai te ahih leh patuah om lo hi. Sep ki pat ding leh sepkhiat ding bek ahi hi ci hi.
?
Dr. Hoda Badran, Chairperson Egyptian Feminist Union and the Alliance for Arab Women in ko Arab gam ukna sungah Numei te thu neih theihna om lo hi. Kumpi sung ah zong Numei makai mimal ki sim thei lai ding hi. Makai ki laihna ah zong numei te makai ding sehna ah ki zekaai mahmah lai hi. Legislature (Kumpi thukhaam/thukhun) bawlna ah zong numei ki hel ki om nai lo hi. Gam thu sungah numei a ki thupi muh mateng Arab gam ah numei te’ thuneihtheihna cikmah in ki lamsang thei ngei lo ding hi. Hih pen ka buaipih pen uh thu hi aa, haksa bek hi lo in bangci nawk ding cih zong ngaihsut haksa mahmah hi ci hi. 
?
Hih Arab gam te ah global terrorism (gamsung/gampua gal); sum leh pai haksatna, biakna khat leh khat ki thusim sak lohna leh minam ki deidanna te nasia lua ahih manin Mihing Thuneihna cih thadah in Numei Thuneihna nasep te zong ki mazang zo lo hi. Arab gam ah numei te in ta tampi nei uh hi. Amau thuneihna ki hel vet lo ahih manin kumsim phialin naupaai, nausuak den uh hi. Pasalte innkuan sung a vaakpi pen ahih naak aa leh ama thu bek in thu hi aa, NUMEI te in thu nei thei lo uh hi. Tua hangin numei tampi tak te in ta tam nei lua uh ahih manin lungsim leh pumpi cidamna naakpi susia hi. Sum le paai haksa ahih manin a tate uh sang ah koih zo lo uh hi. Mihing Thuneihna ah mi khempeuh in pilna sin theihna nei hi mah leh ta tampi a nei te in a tate uh sangah koih zo lo uh ahih manin buaina tampi piangsak aa, khangno tampi te gamsung/gampua galkap ding in tai mang uh hi.
?
KAWAMA cih kammal pen in "Pasal te Thupizaw" numei te san’g cih lungsim pen paihkhiat ding haksa mahmah lai ding hi. Gamsung ki ukna a ki kheel matengin, Women’s Rights leh Women’s Empowerment pen ko a dingin kammal thak a bang den ding suak hi. Thaulawng thautang te Ballpen Khedan te tawh I khek theih masiah Arab gam pen a ngei in om den ding hi, hih pen ko ii haksatna (challenge) pi khat hi ci hi. 
?
Gloria Bonder , Headmistress of Gender and Political Society FLACSO (Latin American School of Social Sciences) in "mi khat peuh in hong sem na ve ci ken la, nang mahmah talawp tak in mapang in." Nang mahmah na ki phum, na ki hel aa pan’ na lak ciang bekin lampi hong ki hong pan ding hi. Khutzepsa in kua in hong sem tam cih sangin, na khut phalhin la ki pan khia in. Hih Beijing+20 ii ngimna te I tangtun’ theihna dingin PASAL te zong PILNA i piak kul masa hi. Pasal tampi takte in Numeite’ Thuneihna cih zong a thei lo leh a tel lo tampi mah om hi. Human Rights, Women’s Right pilna I piak ciangin zong Pasalte ki hel le uh I ngimna te tangcing baih zawh dinga, hih nasepna ah Pasal te mahmah zong hong ki hel thei le uh tangzai baih zaw lai ding hi.
 
Numei Thuneihtheihna cih pen numei bekbek I bulphuh luat ding zong hi thei khin sam lo ahih manin, lai a sim thei, numei te a thupi sak leh numei thuneihtheihna thu a thei pasal te zong tavuan pia in khut kilenin nasem khawm leng "meikaang" bangin ki zel baih zaw ding aa, numei naupangte a ding bek hi lo in I khua I tui, I gam I lei ah liangko kikim in nasem khawm thei le hangh "KHANTOH" na lam leh gaalmuanna, lungmuanna om ding hi. A thupi pen ah Kihel (inclusion) ding thupi, Sawktheihna (access of recourses) nasep na ding a kisam sum leh pai leh nate koi ci ngah ding leh Hawmkhia/Zanghkhia (contribution) kik le hangh mailam I masuan om lai te ah nawklah ding phutlah ding om lo ding hi ci hi. 
?
Susan Hopgood , President, Education International (EI) and the Federal Secretary of the Australian Education Union (AEU) in kum 1975 tan 9 ka hih lai in ko gam ah Numei te in Puankhui bek sin thei ding aa, Pasal te in Singsui dan sin thei ding ci in hong ki khen hi. Kei ka hih leh Singsui dan ka uk mahmah aa ahi zongin hong ki phal lo hi. Numei leh Pasal ki naak khen lua zaw in naupangte in bang uk uh hiam cih tawh hong ki makaih lo zaw hi. Tu hun ciangin numei pasal cih om nawn lo in ei lunglutna leh ei ukna tawh ki zui in pilna siamna ki sin thei ta hi. Karate cih te zong pasal bek in sin nawn lo in numei tampi takin zong sin ta uh hi. Company lianpipi te ah zong Numei makaipi tam mahmah ta hi. Gam ki uk nate ah zong en le hangh Numei makai na om koi koi ta hi. Kum zalom 21 sung ah I lungsim te kum zalom 17 lai lungsim te tawh ki teh thei nawn lo hi. 
?
"Pilna in Thahatna" (Education in Power) hi a cih mah bangin numeipasal om nawn lo in a neu a lian in Sangah pilna sin theihna leh a mau ii ukna tuamtuam ah pantah zo peuh le hangh numei leh pasal ki deidanna leh ki tuambawlna te hong beibei lel ding hi. Pilsinna in mimal khatciatii thuneihtheihna hi aa, sangkah ding in pasal te bek sawla, I tanu te inn nasem ding bek aa I sawl lai tengin liangko kikimna pen mualmong et bang lai ding hi. Kei pen Sang lam tawh ki nahvawh mahmah ka hih man in ka paipai na ah sangkhan sungah naupangte om zia ka encik mahmah hi. Tu hun ciangin ei gengen zong kul nawn lo in, sangkhansung ah siate in numei leh pasal te hih theih, bawltheih, septheih ci -in khen’ tuam a neih kei uh leh tu lai khangno tampi takte hong gol uh ciangin amau khanghun in ki deidanna te zong hong om nawn lo lel ding in ka mu hi. Thu muhna, thu theihna pen sangkah na pan bek hi lo in LAIBU sim na pan zong thu tampi hong musak ahih manin Numeipasal Liangko kikim na ding leh Numei naupang thuneihtheihna te zong I theih beh nop leh laibu tampi tak leh media tuamtuam te ah zong ki gen ahih man in sim ding, ngaih ding leh sep ding thupi ka sa hi. Education is Power and education is an individual rights ahih man in hih tona (challenges) tuamtuam I gualzawhna dingin Pilna mah thupi sak ciat ni. 
?
Nalini Singh, Programme Manager, Advocacy and Capacity Building Asian Pacific Resource and Research Centre for Women (ARROW) in Asia gam ah tona (challenges) a lian pen te ahih leh 

(1) Neek ding kicing ngah theihna (Right to Food) – Asia gam pen ki zawng mahmah lai ahih manin Numei pasal liangko kikim na ah ki buai man lo zaw in innkuan sungah gilpi a ding zonna tawh hun ki bei zaw hi. Gilpi a ding vaihawm pih khit ciangin numeipasal liangko kikimna ding leh numei thuneihtheihna cih thu ki sung thei pan ding hi.

 (2) Khangno Naupaai Khaktanna (Preventing Teenage Pregnancy) – Khangno Numei te a mau ut loh pipi in ki buan in gai uh ahih manin innkuan sung buaina piangsak hi. Numei tampi takte amau leh amau kithat uh hi. Hi lai ah Women’s Rights kisam mahmah hi.

 (3) Zawn’na leh Gilkialna Nenniamna (Eradicating Poverty & Hunger) – Asia gam ah lokho mi ki tam zaw hi. Ahi zongin nasepna a tangcin’ theihna dingin VANZAT a kicing zaw, a hoih zaw tampi ki sam hi. Lokhawh nasep na aa kisam vanzat te amawkna in vaihawm sak zo le hangh gilkial dangtaak leh zawn’na te pan gilvah ankhamna te in tu aa i buai pihpih thute tampi mah hong vengsak zo ding hi. 

(4) Nau Daalna (Contraceptive for Reproduction) – Asia gam ah naudalna te amawkna in ki hawm khia mah leh a zatdan a thei lo mi tampi tak om lai hi. Innkuan khat ah ta a tawm pen 5 ciang bang a nei vive hi aa, innkuan kivaak na ah haksa sa ciat uh hi. Tua aihman in pasal te sangkah sak uh aa, numei te inn ah anau zaw te uh cingin om uh aa, inn nasep huh in om in nu leh pa ahih leh lokho, naseem in diangkhia uh hi. Hih thu 4 teng ahih leh Asia gam ah a thupi pen aa ki ngaihsun ahi hi. Liangko kikim ding cih zong minam ngeina leh biakna ngeina khat tawh a kalsuan Asia minam te lak ah vai sah mahmah lai hi. Tu tadihin Bangladesh, India leh Asia gam tuamtuam te ah Liangko kikim ding ahi a, numei thuneihtheihna leh numei thapiakna te thu buai lua hi nai lo hi mah leh mailam a ding ngaihsut kholhna tawh tu in pilna piapia ta lehangh zong manlang lua/zekaai lua cih om nai tuan lo ding hi. 
?
Tuesday March 10, 2015 (Nitaak lam) 

Hih Numei Khawmpi sungah nisim in mun khat sung bek ah ki muh khopna thu kikupkhopna a om hi lo aa, khan tampi leh mun tampi te ah tentan nam tampi tak om ahi hi. Hih ni in zong Sumbawl mihau tampite, gamsung minam ki pawlna tuamtuamte, numei kipawlna tuamtuamte leh Liangko Kikim nasep theihna ding a lunglut mitampi te hong kikai khawm uh hi. Tua lak ah USA makai luipa zi Hilary Clinton zong hih numei khawmpi ah thugen ding khat in a kisehna tawh kizui in nitak nai 1 hun in UN zumpi ah hong pai hi. Ama thugenna khan ah UN khawmpi a pai mi tul 5 val te kita lo ahih manin khan dang panin video tawh live in ki lak in ki en ciat hi.
?
Hilary Clinton ii thugen a tom in ci leng: "Numei leh Pasal a kua maciatin liangko kikim ding cih pen biakna leh Pasian thusung bek ah zat ding hi lo hi, hi pen thuhoih hi cih I thei tek hi. Gam tuamtuam te leh company tuamtuam te ah zong liangko kikim aa nasem khawm aa, ngahzah kikim ding cih zong thuhoih ahi hi. Hih pen tu laitak aa Numei Khawmpi ii ngiimna leh deihna ahi pipen hi". 

Kum 1995 pan tu ni ciang kum 20 sung in hi bang ciang i kalsuan zawhna pen hong piangkhia ziau, ahi vat (accident) hi lo hi. Hih kum 20 sungin "kipiakkhiatna (commitment); vaipuakna (accountability); ki pumkhatna (unity) leh hanciamna (hard work) te hang ahi hi. Tu ni aa ka lungkim mahmah na ahih leh business tuamtuam te in ahih leh hih liangko kikim na ding vai ah tampi mah hong ki hel thei leh pan’ la ciat na hih man un ka lawlpha mahmah hi. Liangko kikim nasep na a tangcin theihna dingin a beisa ah I sepkhopna te ban ah mailam ah zong nasia tak in semkhawm lai leng I zawhnai loh maban te zong kum zabi 21 sungin zozo ding hi hangh". 
?
Wednesday March 11, 2015 
New action on women's rights - shared responsibilities (10 am – 11:15 am) 
Hih a tunga thulu pen Zomite a dingin thupi sa ka hih manun va kihel ding lunggulh in ka hotel pan un zingsang nai 9 in ka dingkhia uh hi. Hotel leh UN om na pen minute 13 khawng bek ki pai ding hi mah leh New York khuapi cih mah bangin lamdung ah misi vuiding motor ki zui detdat te ka bang uh aa, hunlap in tung zolo ka hih manun hih tentan ka kah kha kei uh hi. Nai 11:30am aa om tentan te lah ki kah man nawn lo, vanleng tual delh kulta ahih manin March 11 ni in kua mah tentan kah man ka om nawn kei uh hi. Hih tentan ah a genkhiat ding uh thute ahih leh: 

1) Mihing Thuneihna Thuguite ( Human rights principles) 

2) Numei Pasal kikal ah thuneihkhop theihna 
(power sharing among women and men) 

3) Kinenniamna leh Ngeina Hoihlote Paihkhiatna 
(overcoming oppressive structures and stereotypes) 

4) Sepsa te bang ciang tangtun’ zo leh kum 20 sunga to-na te etkikna 
(Reviewing progress and set-backs over 20 years) 

5) Europe gam numeite’ Khawmpi 2014 sunga a sepna te uh 
(Nordic women's movement at the Nordiskt Forum 2014)
?
Zogam leh Zomi Numeite: 

Hih UN Numei khawmpi ah thu kisungte i zaak ciangin Zogam ah i sep ding tam mahmah lai cih thu tampi hong mu sak bek tham loin sepnopna lungsim hong khangsak mahmah hi. Mite in amau gam ciat vuah Numei te thuneihtheihna nasia takin a sep khiat laitak un, ei Zomi te in khua kiphawk nai lo hi. Numei te thuneihna vai zong nasia takin Zogam ah i gen, i hilh, i zat ding hun lua mahmah ta hi cih hong mu sak hi. Zogam ah Zomi numeite i hilh sawn ding thu te ahih leh: 

1) Numeite’ Thuneihna (Women’s Rights) 

a. Pilna (education) - Numei te zong pasal te zah mah in pilna zong ding 
b. Cidamna (health) - Numei te cidam na thupi sak leng’ i khua i tui zong cidam ding 
c. Suan leh khak (reproducation) - Innkuan sung ah ta bangzah nei ding cih khentatna ah numei te in thunei thei ding 
d. Nasep (job) - Nasep silbawl leh sum zon’ na ah pasal te mah bangin innkuan ki vaakna ding zong thei sem thei ding 
e. Thukhensat theihna (decision making) - Innkuan sung bek hi lo in, khuasung vai leh ki pawlna te ah zong amau ngaihsutna sung thei bek hi lo in, thu khensat thei ding 
f. Zahtaakna (respect) - Numei te zahtaak piak siam le hangh i khangno te in zong hong zahtaak thei ding 
g. Kihelna (inclusion) - Sepna khat peuh, vaihawmna khat peuh ah Numei te zong kihelsak ding 
h. Kideidanna (no discrimination/exclusion) - Numei te’ tuam paih, tuam bawl lo leh deidan lo zaw in thupi bawl siam ding 
?
2) Numeite Lamsangding (Women’s Empowerment) Nambat 1 na sunga 
a pan h teng i telsiang leh i zatsiam ciang bekin Numei te a lamsang thei i hi pan ding hi. 
?
3) Numeipasal Liangko Kikimna (Gender Equality) Nambat 1 na leh 2 na a om ciang bekin 3na hong picing pan ding hi.
?
Zomi numei te zong mi nuaiah ki om nawn tuan lo hi. Pilna degree te zong thupi mah tase leh i minam, i pianna i gam it ding zun ding leh i minam i khaisan’ ding i vaipuak ahih lam i phawk kei aa leh i pilna degree te a mawkna hong hi lel ding hi. Nam itna, deihsakna leh i gam i lei i puah nop ciangin degree zong kisam masa tuan khol lo lel aa, veina i neih ding thupi masa zaw hi. Mailam ah zong Zomi te in thasial lo in i ngah thupha te zangh siama i minam, i gam i lei a laamsang ding in Topa in a kuamaciat thupha hong pia tahen!
?
Zen Khan Ning (Ningpi Gualnam) 
Seattle, Washington State, USA 
 

Tongsan Media pan Dahpihna

PDFPrintE-mail

Written by Tongsan Admin Sunday, 05 April 2015 20:37

Zogam, Tedim gam Gawngmual khuami, Kawlpi a teng Nu Ngai Za Don (kum 68), hong nusia khinsa Pa Vungh Lian Thang' zi in, tuni Easter Sunday ni in, leitung nuntakna nusia in, a up le a muan Jesu tawh tawntung thawhkikna sungah hong paisan ta ahih manin Tongsan Media pan dahpihna i pulak hi. A nusiat a dah akap khempeuh tungah KST Pasian in mihingte kipiak zawhloh hehnepna thupha na tungsak hen.  
 
Nu Ngai Za Don' tate;
 
1. Pa Zen Suan Thang le Nu Mang Don Cing (Kawlpi)
2. Nu Cing Lun Niang@ NuNu (Zomi Video actress; Tui Buasa Kiluakkik Thei lo, Gibang Khen Kei Ni) le Pa Nang Khan Cin (Kawlpi)
3. Ngem Khawm Niang @ Mi Nge (Pastor, Ciimnuai Baptist Church, Hakha le) Pa Thual Sian Sang
4. Pa En Khan Go (Pinlong hausa) le Nu Mang Sian Huai (Kawlpi)
5. Pa Nang Sian Tung le Nu Dam Lam Lun (Tulsa, USA)
6. Nu Zam Khan Huai le Pa Zam Khan Khai (Kawlpi)
7. Nu Dim Ngaih Nem le Pa Ngul Do Tuang (ZYA makaipi, Kawlpi)
8. Nu Ciin Lun Lam (Zomi video actress; Ngaih Anglai Ah) le Pa Kham Do Dal (Kawlpi)
9. Nu Cing Sian Nem le Pastor Joseph Pau Deih Lian (Victory Community Church, Yangon)
 
Nu Ngai Za Don in a nuntak sungin Pasian zahtakin, thupha tampitak sangin, zong bawl hi. Pasian piak tu zong 26 tak nei man hi. Nu Don nusiat a tuleta khempeuh tawh akibangin dahpihna i pulak hi.
 
By: Tongsan Media Group
 
Ref: En Khat Thang (USA)
 
 

ZCF Korea Kiphuankhia Ta

PDFPrintE-mail

Last Updated on Saturday, 04 April 2015 12:50 Written by Tongsan Admin Saturday, 04 April 2015 11:32

11126438 659451694185763 1431939900 o

Zomite Topa’n ong lamsang in leitung gam tuamtuam ah ki tung hi. Hih meizom in Topan Zomi te Korea ah ong puak hi. Hihbang a thupha ong pia ih biak Pasian phatlo, bialo in ki om theilo a, Zomi ahithei teng kikaikhawm in abeisa 2003 kum pan 2014 kum ciangdong, pawlpi lian khat ahi BOKDEON PRESBYTERIAN CHURCH ii ang vanna nuai ah ki om in biakpiakna kinei hi. Hunte ong pai toto in, Pasian thu leh leitung thu ah nakpi tak in khantohna ong om teh, ih Zomi nam itna zong ong lian semsem a, zokam tawh Pasian phatna leh biakpiakna kizang in nuam ki sa ngiat hi. Tuaban ah ih Zongeina pawite zong kum sim in ki bawl in, ki tai mahmah hi, gamdang a om ka hih uh hang ih pianna ih Zogam a om zah bang phial in ki ngaihsun in, lunglen hunding bang ki mangngilh phial hi.

Tua bang teng kawmkal ah (tukum) 2015 kum akipan Zopau kizang thei nawn lo ding,kawlpau bek zang ding, Zongeina pawite na ngawn zong bawl thei nawnlo ding, tua komkal ah (mi pawlkhat te holhthawhna tawh )Zomi movement limlim deihlo cih thu hong nangawn ong om mawk teh lamdang kisa mahmah tek a, Zomi hi ingh aki ci sinsen te lungtang nakpi tak in ong sukha a, ngaihsutna lianpi ong nei khia sak hi. Hihbang thu ong om mawk teh every Saturday sim in, meeting kinei to pah litlit a, atawpna ah ZOMI taktak teng Zomi Christian Fellowhship cih minpua in tuamdin ding khensatna 28.2.2015 (Sat.) ni in ka nei uh hi. Tua ban ah leitung bup Zomi te tutkhawp, khawlkhop theihna ding cih ngimna tawh ZOMI INNPI ( ZOMI HOUSE ) cih Innpi khat ka na vaihawm pah uh hi.

Topa’n geelna te ong tang tungsak takpi a, March 14, 2015 ni in Zomi Innpi lutna kinei in, hihmun ah abeisa kha nih sung bang eikam zatkhak lohna pan , Pasian ong piak ih Zopau ngiat tawh ZOMI a ong piaksak, pau leh lai ong neisak Pasian min kiphat a , nuam kisa tek in, zongh akua maciat suakta kisa mahmah zo pan hi ungh. ZOMI akua-ma peuh Korea nong pai uh leh ih Innpi ah ong bang, ong khawl un cih ong zasak ungh. Ih innpi ah nuamtak khawlkhawm ni!

Zomi Christian Fellowship of Korea

Contacts:

1. Siam Za Khai

Ph: 82-010 6447 5179

Email: This e-mail address is being protected from spambots. You need JavaScript enabled to view it

2. Mang Suan Khai

Ph: 82-010 2181 7336

Email: This e-mail address is being protected from spambots. You need JavaScript enabled to view it

 
 

Page 3 of 715

TONGSAN Video

TONGSAN Photo Gallery

TONGSAN Weekly Journal

Who's Online

We have 391 guests online
Joomla Templates and Joomla Extensions by ZooTemplate.com